Стануваше збор за мала група луѓе – рече премиерот и додаде дека не успеал да го забележи навредливото скандирање на натпреварот Македонија-Романија кој се одржа во саботата во Куманово, а на кој присуствуваше лично
Додека бев на натпреварот воопшто не го ни забележав скандирањето бидејќи стануваше збор за мала група на луѓе. Ова денеска го изјави премиерот Христијан Мицкоски одговарајќи на новинарски прашања во врска со кошаркарскиот натпревар Македонија-Романија кој се одржа во саботата во Куманово, а на кој можеа да се слушнат националистички скандирања од страна на дел од навивачите.
Мицкоски додаде дека апсолутно го осудува ксенофобичното и националистичко скандирање на неколкумина кои, како што рече, не наишле на поддршка од ниту еден од присутните во салата.
„Би сакал да ја искористам приликата и да се приклучам кон осудата на национализмот и ксенофобијата, најпрво на таа што се случи за време на кошаркарскиот натпревар помеѓу Македонија и Романија, а потоа да упатам порака до сите навивачки групи да навиваат спортски и да го бодрат својот тим и националниот тим. Тоа е она што оваа влада го поддржува, а сè останато ќе биде предмет на истрага и санкции без разлика од која страна доаѓа“,
изјави Мицкоски одговарајќи новинарски прашања по поставување на камен-темелник на нова спортска сала во Воената Академија.
Во однос на мечот во Куманово, новинарско прашање му беше поставено и на министерот за спорт Борко Ристовски, конкретно зошто неговиот ресор не реагирал за случајот.
„Ние како Министерство не можеме да реагираме затоа што (скандирањето) не доаѓа од спортски субјект, доаѓа од навивачи, така што ние немаме апсолутно никаква ингеренција да реагираме кога доаѓа од навивачи. Меѓутоа, еве, нека биде ова апел дека во Македонија нема потреба од такви скандирања ни од едната, ни од другата, ни од која било страна. Ние ќе работиме најнапред на едукација на навивачките групи, навивачите дека секој има право да ја поддржува својата екипа, својата репрезентација, но дека вакви немили настани не смее да се случуваат. Од позиција на Министерство за спорт ние не можеме ништо друго освен да ги едуцираме и да апелираме“,
изјави Ристовски.
Основното јавно обвинителство (ОЈО) Куманово вчера информира дека постапува во врска со инцидентот на кошаркарскиот натпревар во Куманово – чин кој го осудија и власта и опозицијата.