Лидерот на ВМРО-ДПМНЕ рекол дека „македонската економија тоне од ден на ден и е убедливо на дното во Европа, додека земјата станува се позадолжена, а граѓаните се посиромашни“
Оваа власта нема план, ниту способност како да се справи со ценовниот шок кој допрва следи, како и со енергетската криза и тоа лошо ќе се одрази по семејните буџети на граѓаните, оценил претседателот на ВМРО-ДПМНЕ, Христијан Мицкоски, на онлајн средба со шефицата на мисијата на Меѓународниот монетарен фонд ММФ за земјава, Берглјот Бјорнсон Баркбу и резидентната претставничка на ММФ за Западен Балкан, Стефани Ебле.
На средбата, како што соопштуваат од ВМРО-ДПМНЕ, биле отворени повеќе теми, при што фокусот е ставен на актуелната политичка и економска ситуација во Македонија, како и на енергетската криза со која се соочуваат граѓаните.
Мицкоски истакна дека поради „лошото работење на власта македонската економија тоне од ден на ден и е убедливо на дното во Европа, додека во меѓувреме земјата станува се позадолжена, а граѓаните се посиромашни“.
Мицкоски потенцирал и дека власта нема намера да ги решава таквите проблеми, а „доказ за тоа се високата корупција која ја потврдуваат сите релевантни меѓународни институции, но и немањето владеење на право во Македонија“.
Како што информираат од ВМРО-ДПМНЕ, Мицкоски на средбата нагласил дека „за Македонија е неопходно да стане членка на Европската Унија, и покрај фактот што власта потфрли да се справи со криминалот и корупцијата“, но, како што се посочува, Македонија не заслужува во 21 век да продолжи да биде заложник на спорот со Бугарија.