Според изјавата што премиерот ја даде одговарајќи на новинарското прашање на денешната прес-конференција со претседателот на Европскиот совет, Антонио Кошта, средбата со претставниците на Бугарија, Мицкоски претпочита да се случи во Брисел, заедно со европските претставници, а не во Скопје или во Софија
Премиерот Христијан Мицкоски вели дека е подготвен за разговори со бугарска страна во кое било време за соочување на аргументите за спорот околу внесувањето на Бугарите во Уставот.
Според изјавата што тој ја даде одговарајќи на новинарското прашање на денешната прес-конференција со претседателот на Европскиот совет, Антонио Кошта, средбата со претставниците на Бугарија, Мицкоски претпочита да се случи во Брисел, заедно со европските претставници, а не во Скопје или во Софија.
„Јас сум подготвен во кое било време – и таа подготвеност му ја пренесов на господинот Кошта – да дојдам во Брисел, дали во негово присуство или во присуство на претседателката на Европската комисија, Фон дер Лајен, во било чие присуство да седнеме, да разговараме кога било и колку и да треба за да дојдеме до заедничко решение како двете страни да испорачаат“,
рече Мицкоски.
Премиерот ова го кажа прашан зошто не побара средба со бугарскиот премиер во услови кога Бугарија веќе одреден период има политичка влада – причина која пред нејзиното формирање Мицкоски ја наведуваше како неможност за разговори поради непостоење соодветен соговорник во Софија.
Потенцира дека ставот за уставните измени останува непроменет и дека ќе остане таков додека Софија не покаже добра волја и не ги спроведе 14-те пресуди од Судот во Стразбур кои се однесуваат на Македонците во Бугарија.
„Имаме проблем и затоа сакаме да разговараме за да го решиме, но ова е двонасочна улица. Ако едната страна испорачува континуирано, а другата ништо, тогаш нема цел и поента. Но, ако испорачаат и двете страни, а јасно е што треба да испорача втората страна, тогаш можеме да седнеме и да се договориме. Не можам да излезам пред македонските граѓани и да им кажам дека ќе биде променет Уставот, а притоа да заборавам дека најмалку 14 пресуди има од Стразбур за Македонците од другата страна на границата кои Бугарија игнорира да ги примени“,
рече Мицкоски.
Премиерот порача дека посветеноста на земјава кон процесот на евроинтеграција ќе остане и ќе се засили во претстојниот период и изрази надеж дека тој ќе биде одблокиран со достоинство, како една од основните вредности на Европската Унија.
„Кога ќе имаме јасна позиција, и од страна на ЕУ, и од страна на сите земји членки околу многувековниот македонски идентитет, јазик, и околу вистинската желба да бидеме дел во европското семејство, но и почитување на европските институции како што е Европскиот суд за човекови права, тогаш јас сум тука подготвен да разговарам во секое време за сè. Решавањето на проблемите е ако ги идентификуваме проблемите, а ако се држиме на формалности – нема никогаш да ги решиме проблемите“,
рече Мицкоски на заедничката прес-конференција со Антонио Кошта.