Лидерот на ВМРО-ДПМНЕ присуствуваше на настан за изградба на нов булевар во Охрид од каде испрати порака дека со работа на локално ниво ќе покажат дека можело да се работи поинаку. А, од СДСМ прашуваат која е неговата улога и бараат Антикорупциска да реагира. Ова, велат социјалдемократите, потсетува на времето кога Груевски беше и премиер и министер и градоначалник
Новиот градоначалник на Охрид од ВМРО-ДПМНЕ, Кирил Пецаков, денеска во присуство на партискиот лидер, Христијан Мицкоски, најави започнување со изградба на булеварот „Македонски просветители“, а по настанот од СДСМ реагираа дека Мицкоски ги партизира општините и го прашаа во кое својство тој врши увид и разговара со директори на јавни претпријатија.
На настанот, охридскиот градоначалник рече дека документацијата на овој проект била завршена претходно и сега само треба да се распишат тендери.
„Во моментов само ќе тендерираме уште две работи коишто не беа завршени по однос на документација и бидејќи проектот ќе биде во изградба, односно рокот е шест месеци тековно ќе ги средиме документите и самиот тендер за осветлување. Така ќе имаме комплетно булеварско решение со двосмерна велосипедска патека, две пешачки патеки и секако две коловозни ленти коишто ќе се движат во двата правци“,
рече Пецаков.
Мицкоски се пофали дека промените во Охрид започнуваат со многу проекти и рече дека на локално ниво ќе покажат дека можело и поинаку да се работи. Рече дека нема да се жалат, но „ако било лесно, немало да бидат тие“.
„Ќе се обидеме на локално ниво да покажеме дека можело поинаку и дека можеме сите заедно да работиме чесно и да ги исполниме очекувањата на граѓаните во рамки на можностите се разбира. Нема да критикуваме, нема да се жалиме колку е тешко, тешко е, се знае затоа што ако било лесно прво немало да бидеме ние, а второ ако состојбата со општината и со јавните претпријатија коишто се дел од оваа општина била добра, тогаш сигурно немало граѓаните довербата да ја дадат на ВМРО-ДПМНЕ, ќе ја дале довербата на нашите претходници“,
рече Мицкоски.
СДСМ, пак, во реакцијата ја повика Државната комисија за спречување корупција да реагира бидејќи ова, според нив, е партизација на општините и злоупотреба.
„Мицкоски со неговите увиди врши груба партизација на општините. Во кое својство Мицкоски врши увиди па дури и разговара со директори на Јавни претпријатија под надлежност на општините? Дали Државната комисија за спречување на корупцијата, ќе реагира за оваа злоупотреба или чека некој друг да поднесе претставка? Мицкоски со ваквите постапки само докажува дека не е излезен од режимската матрица, од времето кога лидерот на ВМРО-ДПМНЕ беше и премиер и министер и градоначалник. Ништо не е сменето во ВМРО-ДПМНЕ Мицкоски е само копија на неговиот ментор и криминалец во бегство, Никола Груевски“,
велат од СДСМ.