Изјавата која пред гласањето на интерпелацијата ја даде пратеникот од СДСМ, Јован Митрески, со која му порача на државниот обвинител дека „од него зависи дали ќе биде со штитот или на него“, според координаторот на ВМРО-ДПМНЕ, е директна порака до Коцевски да остане таму каде што е и да продолжи да ги брани СДСМ и ДУИ
Откако пратениците попладнево ја изгласаа интерпелацијата за државниот обвинител Љупчо Коцевски, координаторот на пратеничката група на ВМРО-ДПМНЕ, Никола Мицевски, во објава на својот фејсбук-профил ја прокоментира изјавата која пред гласањето ја даде пратеникот Јован Митрески од СДСМ.
Митрески во изјавата му се обрати лично на Коцевски: „Од тебе зависи дали ќе бидеш со штитот или на него“.
Ваквата изјава, според координаторот на ВМРО-ДПМНЕ, е директна порака до Коцевски да остане таму каде што е и да продолжи да ги брани СДСМ и ДУИ наместо, како што вели, да преземе одговорност и да постапува професионално и независно. Со пораката, како што вели, СДСМ му дава до знаење на обвинителот дека не смее да се повлече од улогата на заштитник и мора да продолжи да ги штити нивните криминали.
„Љупчо Коцевски, со оваа политичка ‘поддршка’ која што ја добива од двоецот СДСМ-ДУИ, се става во позиција да биде симбол на одбраната на криминалните структури и коруптивните шеми кои ја уништија Македонија и ја урнисаа довербата на граѓаните во правосудниот систем.Од друга страна, се поставува прашањето: Дали оваа ‘лозинка’ на СДСМ е порака на поддршка или порака на закана кон Коцевски? Едно е јасно и кристално чисто. Денес маските паднаа, а граѓаните ја дознаа вистината! СДСМ и ДУИ се во очаен и последен обид да го спасат Коцевски, бидејќи само така можат да го заштитат својот криминал“,
пишува Мицевски во објавата на Фејсбук.
Според Мицевски, тоа што СДСМ не ја поддржал интерпелацијата за работата на Коцевски го дава одговорот зошто ниту еден функционер од оваа партија не е гонет од обвинителството со кое раководи државниот јавен обвинител, дури и по една година откако партијата е во опозиција.
„Нема да дозволиме јавниот обвинител како институција да биде нечија алатка за спас од одговорност, ниту на СДСМ, ниту на ДУИ, ниту на било кој друг политички центар на моќ“,
додава тој.
Претходно денеска Собранието со 71 глас „за“ и без ниту еден „против“ или „воздржан“ ја прифати интерпелацијата за работата на републичкиот јавен обвинител Љупчо Коцевски, поднесена од Левица.