Овој договор, како што нагласи Мицевски, не е класифициран и не се чува во четири ѕида како претходните на владата на СДСМ и ДУИ
Стратегиската позиционираност на Македонија во регионот, развојот на инфраструктурата, здравството, енергетиката, науката и зацврстување на институциите ќе овозможи Договорот меѓу Владата на Република Северна Македонија и владата на Обединетото Кралство во врска со партнерство за реализација на инфраструктурни проекти, истакна денеска на прес-конференција во Собранието координаторот на пратеничката група на ВМРО-ДПМНЕ, Никола Мицевски. Тој во исто време информира дека комисиската расправа за ратификација на Договорот завршила и оти за него ќе се расправа на денешната пленарна седница.
Мицевски ја повика опозицијата на конструктивност и апелираше да гласа за Договорот зашто, како што рече, тој е историски за Македонија.
„Ние ги повикуваме да се приклучат на овој еден голем да речеме историски момент. Фигуративно ќе кажам, возот е тргнат, може да се качат ако сакаат. Мислам дека ова е последната станица на која можат да го фатат приклучокот“,
рече Мицевски.
Овој договор, како што нагласи тој, не е класифициран и не се чува во четири ѕида како претходните на владата на СДСМ и ДУИ.
„Повикувам на зрелост и конструктивност од опозицијата предводена од СДС и ДУИ. Ова не е договор на ВМРО-ДПМНЕ, туку на Македонија, за сите граѓани. Неговото отфрлање е одење против народот и интересите на Македонија. Затоа очекувам прифаќање на подадената рака за заедништво и поврзување на Македонија. Ова не е време на поделби, на криминал и рушење на позиции. Сега е време на градење, придонесување за иднината на сите. Сега е време за Македонија“,
рече координаторот на пратеничката група на ВМРО-ДПМНЕ.
Предлог-законот за ратификација на Договорот меѓу Владата на Република Северна Македонија и владата на Обединетото Кралство доби зелено светло од собраниската Комисија за надворешна политика по што денеска се очекува да се најде на дневен ред на 52. пленарна седница. Предлог-законот беше поддржан со 10 гласа „за“ и ниту еден глас „против“.
Според пратениците од ВМРО-ДПМНЕ, ваквиот договор ќе овозможи економски развој на државата затоа што на располагање се ставаат пет милијарди фунти што е голема инјекција за економијата, а спроведувањето ќе биде контролирано.
Според опозицискиот СДСМ, не се работи за договор, туку за меморандум за соработка во кој се изразуваат намери на соработка.
„Содржината е коректна од аспект на меморандум, но формата меморандум да се прикаже како договор прави преседан во одлуките што ги носи Собранието и во иднина може да предизвика вакви меморадуми да бидат претставувани како договори“,
рече пратеникот Димитар Ковачевски од СДСМ.
Владата на седница на 20 мај го усвои текстот на Договорот со кој е дефинирано партнерство за реализација на инфраструктурни проекти, а Предлог-законот за негова ратификација вчера беше испратен во Собранието.
Целта на Договорот, што ќе биде во сила 10 години, е да воспостави партнерство за поддршка на реализација на инфраструктурни проекти во секторите транспорт, здравство, технологија, енергетика и други критични сектори во државата.