Митрески: Задоволен сум што првиот Указ што го потпишав во Собранието е за Законот за употреба на македонскиот јазик

„Македонскиот јазик е заштитен како симбол на нашиот идентитет и посебност. Наша обврска е да го негуваме и унапредуваме, но и да го промовираме на домашен и меѓународен план, каде со мудрите политики и одлуки му обезбедивме рамноправно место со јазиците на сите земји членки на Европската Унија“, вели новиот претседател на Собранието

Посебно сум задоволен што првиот Указ што го потпишав, како претседател на Собранието, е Указот за прогласување на Законот за употреба на македонскиот јазик, напиша на својот Фејсбук новиот претседател на Собранието Јован Митрески, откако денеска со 96 гласа „за“ пратениците го усвоија Законот за употреба на македонскиот јазик, што е прва промена на досегашното законско решение од 1998 година.

„Македонскиот јазик е заштитен како симбол на нашиот идентитет и посебност. Наша обврска е да го негуваме и унапредуваме, но и да го промовираме на домашен и меѓународен план, каде со мудрите политики и одлуки му обезбедивме рамноправно место со јазиците на сите земји членки на Европската Унија“,

напиша тој.

Според него, новото законско решение предвидува задолжително лекторирање на сите материјали, но и предвидува обврска за задолжително вработување на лектори по македонски јазик во сите јавни институции и органи на владата.

„Го зајакнуваме инспекцискиот надзор, се основа инспекторат за примена на македонскиот стандарден јазик, но исто така се создава и правна основа за донесување на национална стратегија за македонскиот јазик за период од пет години. Преземаме и конкретни мерки за зголемување на интересот кај младите да го изучуваат македонскиот јазик. Создаваме можности за доделување стипендии за учениците од четврта година средно образование, додипломски студии, магистерски и докторски студии“,

вели Митрески.

Јован Митрески избран за нов спикер без поддршка од ВМРО-ДПМНЕ, Пендаровски денеска ќе му го врачи мандатот на Џафери

Предлогот Митрески да биде избран за нов претседател на Собранието претходно денеска беше поддржан од 64 пратеници од вкупно 104 кои гласаа. Против предлогот гласаа 40 пратеници, а воздржани немаше. По ова, новоизбраниот спикер положи заклетва и седна на спикерското столче.

Митрески досега беше координатор на пратеничката група на СДСМ.