Суспендираните материи од органско и неорганско потекло, тешко се раствораат во водата и според Митовски се главен показател и за присуството на тешките метали во Крива Река. Тој дополнува дека резултатите од сегашната и претходната анализа на општината, покажуваат дека водата во Крива Река е неупотреблива и сериозно загадена
Водата во Крива Река е сериозно загадена, спаѓа во најлошата категорија загадени води и е неупотреблива за каква било намена, рече денеска градоначалникот на Крива Паланка, Сашкo Митовски.
Тој рече дека новите анализи спроведени од Институтот за јавно здравје на барање на риболовното друштво „Мрена“, покажуваат дека има надминување на граничните вредности и на матност на реката.
Митовски побара институциите да реагираат, а обвинителството да поведе постапка.
„Врз основа на стручното мислење, површинската вода спаѓа во петтата класа од уредбата за класификација на водите поради зголеменото ниво на олово – 36,65 микрограми на литар во однос на максималната вредност 10 микрограми од дозволените на литар. Оваа класа на водата согласно уредбата е многу загадена, хипертрофична вода која во природна состојба не може да се употребува за ниедна друга намена. Концентрацијата на штетни супстанции што ги надминува акутните нивоа на токсична за водниот свет. Вода во оваа класификација, односно петта класа, не смее да се користи за ништо ниту, пак, за наводнување“,
рече Митовски.
Градоначалникот презентирше и резултати од загаденоста на водата со манган, цинк и кадмиум чии надминувања придонесуваат водата да не смее да се употребува за друга намена, без претходно да се обработи.
„Дополнително врз основа на стручното мислење поради загаденоста на манган 188,242 микрограми наспроти дозволените 50 микрограми, цинк 113, 187 микрограми наспроти 100 од дозволените и кадиум 2,158 мигрограми наспроти 0,1 од дозволеното на литар спаѓа во третата класа од уредбата за класификација на водите заради енормното загадување со горенаведените супстанци. Според овие параметри, таа спаѓа во трета класа и може да се употребува за друга намена со соодветна обработка“,
рече Митовски.
Според физичките показатели при анализата на водата во Крива Река, Митовски рече дека матноста е со 170 единици од дозволените 10 гранични вредности, додека хемиските показатели на суспендираните материи што се присутни во водата што ја намалуваат пропустливоста на светлината, а влијаат и врз животната средина и го уништуваат живиот свет се со вредност од 7 876 микрограми на литар од макисмум дозволените 30 микрограми на литар.
Суспендираните материи од органско и неорганско потекло, тешко се раствораат во водата и според Митовски се главен показател и за присуството на тешките метали во Крива Река. Тој дополнува дека резултатите од сегашната и претходната анализа на општината, покажуваат дека водата во Крива Река е неупотреблива и сериозно загадена.
„Двете истражувања патем којшто кажавме дека се направени од независни акредитирани лаборатории односно од една акредитирана лабораторија и од државниот Институт за јавно здравје потполно нејасно е како тврдењата на ’Булмак 2016’ дека загадувањето не е од истекувањето и причината од хаваријата од цевката настаната во рудникот Тораница. Имено, согласно А-еколошката дозвола којшто ја поседува ’Булмак 2016’ рудникот ’Тораница’ во нивниот процес користат токму кадиум, цинк, олово цијанид и останати соединенија коишто се наоѓаат во Крива река веднаш по хаваријата и тоа е многу јасно и децидно се гледаат токму во двете анализи коишто ги имаме веќе како релевантен доказ“,
рече Митовски.
Градоначалникот на Крива Паланка, апелираше институциите да реагираат брзо, обвинителството да отвори постапка, потсетувајќи дека изминатата недела е поднесена кривична пријава.
За него е нејасно зошто и Државниот инспекторат за животна средина не направил ургентни анализи на водите по хаваријата во рудникот „Тораница“.
Митовски во одговор на новинарски прашања рече дека целокупната постапка на државниот инспекторат, толкувањата и вчерашната прес-конференција на менаџментот на компанијата отвораат дилеми и прашања, и ја загрижуваат јавноста во Крива Паланка.
„Од тоа што имаме можност да го видиме од записникот којшто е објавен на официјалната веб-страница на Државниот инспекторат никаде не е констатирано или, пак, наложено на правното лице да изврши анализи на водите во Тораничка река и Крива река. Дополнително Државниот инспекторат имал обврска и морал согласно нивните договори коишто ги имаат со акредитирани лаборатории да извршат и да направат ургентна анализа на водите на Тораничка и на Крива река она што еве денес ќе имаме можност да го видиме, а се потврдува со сите наоди коишто ги имаше општината од претходниот период од извештаите од акредитираната лабораторија од минатата недела и денеска од овие лабораториски известувања направени на барање на здружението ’Мрена’ навистина се потврдуваат тврдењата на општината дека Крива Река е сериозно загадена“,
додаде Митовски.
Во петокот, од Министерството за животна средина и просторно планирање соопштија дека „Булмак 2016“ од Пробиштип, подружница рудник „Тораница“, Крива Паланка е казнет со 200 илјади евра за инцидент во кој пукнала цевка преку која се доведува технолошката вода од таложникот за јамски води до погонот флотација, прекршок, кој е од трета категорија.
По ова, Митовски на прес-конференција рече дека извештајот од испитаните примероци на водата во реката еден ден по хаваријата во рудникот „Тораница“ покажал дека концентрацијата на олово во Крива Река е зголемена за десет пати повеќе од дозволеното, а за неколку стотици пати на цијанид, фосфор и азот.
Од компанијата „Булмак 2016“, која стопанисува со рудникот „Тораница“ ги демнатираа тврдењата на Митовски и рекоа дека од дефектната цевка е истечена исклучиво атмосферска вода која, освен природни механички нечистотии мобилизирани од поројниот тек, не содржи никакви хемиски или друг вид супстанци и материи што се резултат на технолошкиот процес од флотацијата на рудникот.
Ден по ова од Социјалдемократскиот сојуз на Македонија (СДСМ) предупредија дека излевањето цијанид и други опасни материјали во Крива Река може да биде една од најголемите еколошки катастрофи во поновата историја. Според нив, итно треба да се направат анализи и во реките Пчиња и Вардар бидејќи, како што рекоа сè што се продава на пазарите во Скопје, Куманово, Крива Паланка, Велес и другите градови, се наводнува од реките од тој слив.