Пред своите сограѓани, Заев ја критикуваше и опозициската ВМРО-ДПМНЕ, оценувајќи дека нуди „стари режимски кадри“
Премиерот и лидер на СДСМ, Зоран Заев, вечерва на митинг во неговата родна Струмица, рече дека кога го гледа кандидатот за градоначалник Костадин Костадинов (актуелен пратеник) како да се гледа себеси во 2005 година, кога првпат беше избран на чело на оваа општина.
„Кога го гледам Костадин како да се гледам себеси. Јас станав градоначалник на 30 години, а тука некаде е и тој и ги има истите елан и енергија, како и искуството како советник и в.д. градоанчалник“,
рече лидерот на СДСМ за новиот кандидат на владејачката партија за градоначалник на Струмица, кој едно време беше в.д, градоначалник, кога Заев се повлече од функцијата пред да биде избран за премиер.
Пред струмичани, Заев ја критикуваше и опозициската ВМРО-ДПМНЕ, оценувајќи дека нуди „стари режимски кадри“.
„И сега слушаме, Мицкоски и ВМРО-ДПМНЕ се расфрлуваат со некои петоцифрени бројки за некакви проекти, што ги ветуваат во некаква нова иднина, но стари режимски кадри и нова иднина не одат заедно. Не може луѓе свртени кон минатото да реализираат иднина“,
рече Заев.
Тој истакна дека Мицкоски сака да се врати во минатото и дека затоа зборува за поништување на Преспанскиот договор и на Договорот за добрососедство.
„Тоа е за него е новата иднина за која само ВМРО-ДПМНЕ сонува. Зборува за поништувања на договорите со Грција и со Бугарија. Пак ќе ја испокараат државата со сите соседи. Ќе продолжат да го делат народот со режимски тактики, таму каде што застана Груевски, и да го подриваат соживотот, за јавноста да има страв за својата безбедност, а тие да продолжат да крадат. Ако ни зборува за таква нова иднина, ред е и на овие избори, по седми пат да му речеме: ‘Мицкоски Не благодарам!““,
нагласи Заев.