Во врска со коментарите на лидерот на СДСМ, Венко Филипче, дека отфрлањето на обвинението против директорот на АНБ, Бојан Христовски, од страна на обвинителството е политички притисок од ВМРО-ДПМНЕ, Митева рече дека одлуката е на судството и обвинителството составено од кадри што тие ги поставиле
Анализите за спојување на разузнавачките агенции во една се во напредна фаза и штом ќе се створат услови јавноста ќе биде информирана, изјави денеска портпаролката на Владата Марија Митева одговарајќи на новинарски прашања на прес-конференција.
Во врска со коментарите на лидерот на СДСМ, Венко Филипче, дека отфрлањето на обвинението против директорот на АНБ, Бојан Христовски, од страна на обвинителството е политички притисок од ВМРО-ДПМНЕ, Митева рече дека одлуката е на судството и обвинителството составено од кадри што тие ги поставиле.
„Колку и да се обидуваат да ги лиферуваат оние лажни вести, дезинформации, колку и да се обидуваат од секоја ситуација да направат политика, да зборуваат дека некој користел лажни сертификати, дека ги менувал, поправал итн, би кажала дека дури и вакво судство и обвинителство кое е составено од кадрите кои тие ги оставија, не можат да ја сокријат вистината. Односно вистината денеска излегува на виделина, а тоа е дека не постојат лажни сертификати по однос на овие изнесени ставови од СДСМ кои континуирано имаа за цел да направат дискредитација на директорот на Агенцијата за национална безбедност“,
истакна Митева.
Од ОЈО Скопје вчера информираа дека не нашле ништо спорно со ТОЕФЛ-сертификатот за познавање англиски јазик на директорот на АНБ, Бојан Христовски.
Заклучокот е дека Христовски не направил лажна исправа со намера да ја употреби како вистинска и не употребил преправена исправа како вистинска ниту, пак, како доказ во правниот сообраќај употребил исправа, книга или спис за кои знае дека се невистинити.
„360 степени“ објави серија стории во врска со проблематичниот ТОЕФЛ-сертификат на директорот на АНБ, Бојан Христовски, издаден од училиште „Јулија КО“ од Пловдив, Бугарија.
Од судски пресуди, во кои имавме увид, произлезе дека две директорки на јавни уставнови, по признание на вина, биле осудени на условни казни од две години затвор поради тоа што употребиле докумнет со невистина содржина, односно ТОЕФЛ-сертификти токму од „Јулија КО“ од Пловдив.
Случајот со двете директорки завршил на суд по кривична пријава од Министерството за внатрешни работи (МВР) во време кога со него раководеше Панче Тошковски.
Кратко по неговото именувањето на Христовски за директор на АНБ и сите прашања и сомнежи што се отворија околу исполнувањето на условите и приложените документи, тој беше гостин во „360 степени“. Интервјуто беше емитувано на 26 октомври 2024 година на МРТ 1.
Во него тој не кажа дека испитот го полагал од дома, а на прашање зошто се стекнал со сертификат за познавање на англиски јазик во Пловдив, а не во Скопје, Христовски рече дека тоа бил најбрз начин како да дојде до таа диплома, велејќи дека во Пловдив имало „отворен термин за полагање“.