Владината портпаролка, одговарајќи на новинарско прашање, изјави дека остануваат посветени на состојбата со Фондот за пензиско и инвалидско осигурување и оти ги разгледуваат сите состојби како да имаме стабилен пензиски систем
Владата не размислува за препораката на Фискалниот совет за зголемување на старосната граница за пензионирање на мажите и жените на 67 години, изјави денеска владината портпаролка Марија Митева, но не беше конкретна во одговорот на кој начин извршната власт планира да ја пополни дупката во Фондот за пензиско и инвалидско осигурување (ФПИОМ).
Одговарајќи на новинарско прашање, таа првин се осврна на линеарното зголемување на пензиите, додавајќи дека остануваат посветени на состојбата во Фондот за пензиско за да се обезбеди еден стабилен систем.
„Па, во овој момент она што го направивме е усогласување со покачувањето на пензиите од 5 000 денари, имаме активна методологија, имаме закон по кој се работи, гледаме како да ги стабилизираме сите состојби, така остануваме посветени на состојбата во Фондот и ќе ги разгледаме сите состојби како да имаме еден стабилен систем. Во овој момент не се размислува за она што беше предлог од страна на Фискалниот совет“,
изјави Митева.
На препораката на Фискалниот совет за зголемување на старосната граница за пензионирање денеска реагираа од Сојузот на синдикатите на Македонија (ССМ), чиј претседател Слободан Трендафилов ја оцени како сериозни загрижувачки предлог.
Без волјата и потребата на работниците, како што рече тој, нивниот работен век не може да се продолжува и да се одложува заслуженото пензионирање како покритие за лошите политики долг период наназад.
„Доколку членовите на Фискалниот совет сакаат да помогнат во крпење на буџетот во Фондот за пензиско, можеби треба да почнат да плаќаат придонеси од задолжително социјално осигурување за сите нивни приходи што ќе претставува пример и за останатите кој треба да се следи!“,
вели Трендафилов во изјава за МИА.
Според претседателот на ССМ, потребни се мерки за зголемено вработување на младите по пат на реални и одржливи работни места како резултат на нови домашни или странски инвестиции и зголемување на платите, а со тоа и зголемување на средствата во Фондот за пензиско осигурување. За младите да се задржат да живеат и работат во земјава, како што вели Трендафилов, потребно е воведување на мерки за пристојна работа со почитување на правата од работен однос според меѓународните трудови стандарди.
Фискалниот совет вчера излезе со предлог од 2026 година да се зголеми старосната граница за пензионирање за мажи и жени на 67 години и истовремено да се зголеми стапката за пензиско осигурување за 0,7 процентни поени, односно да изнесува 19,5 проценти.
Предлогот е дел од Фискалната стратегија 2025-2029 година.
„Фискалниот совет е на мислење дека за одржување на Фондот на ПИОМ, намалување на фискалните ризици и консолидација на буџетот во наредниот среднорочен период, потребни се дополнителни мерки, како зголемување на работниот век на вработените и постепено зголемување на придонесот на пензиско и инвалидско осигурување (тековно е на 18,8 проценти што е намалување од 2,4 проценти во однос на 2008 година кога изнесуваше 21,2 проценти). Кога на тоа би се додало стареењето на населението, а со тоа и секоја година зголемувањето на бројот на пензионери за околу 1 500-1 700 нови пензионери секоја година, придружувано и со преференцијата за емигрирање на младите во странство, а со тоа и релативно намалување на покриеноста на пензиските приходи со наплатените придонеси, проблемот уште повеќе станува комплексен. Оттука фискалната одржливост на Фондот на ПИОМ претставува посебен фискален ризик“,
се наведува во мислењето од Фискалниот совет.
Во однос на зголемувањето на стапката за пензиско осигурување, од Фискалниот совет препорачуваат во 2027 година да се направи анализа за фискалната одржливост на Фондот на ПИОМ и во зависност од трендот и потребата, постепено да се зголемува придонесот до 21 проценти до 2029 година.