Залудни се обидите преку низок ПР, СДС да се надева дека ќе успее да го поткрене сопственото реноме. Филипче мисли дека со креирани лаги ќе избега од одговори за сите катастрофи изминативе седум години, но одговори и одговорност мора да има, вели Митева
Наместо грижа за сопствената катастрофа, СДС со наталожени лаги и измислици сакаат да ги манипулираат граѓаните преку скапо платениот ПР, обвини портпаролката и пратеничка на ВМРО-ДПМНЕ, Марија Митева. Според неа, за време на претходната власт, агенцијата „Рејтинг“ во сопственост на Никола Спасов добила тендери во вкупна вредност од над 900.000 евра.
„Во 2020 година од Град Скопје, ‘Рејтинг’ на Спасов добила над 16.000 евра, но исто така и 4.500 евра од Општина Карпош. Во 2021 од Општина Охрид добил 15.000 евра, сите тендери во период кога градоначалници се од редовите на СДС. Истата година, ‘Рејтинг’ на Спасов добила 60.000 евра од Министерството за здравство, предводено од неговиот сегашен шеф, Венко Филипче. Понатаму, во истата година, во месец август Спасов од Владата добил тендер вреден цели 300 илјади евра. Во 2022 година, пак, исто од Владата добил над 420.000 евра, за промоција на македонското вино во Белград. Истата година во декември, Спасов добил тендер од 50 илјади евра од Министерството за финансии и уште еден од 100.000 од Министерството за надворешни работи“,
посочи Митева.
Во 2023, како што посочи таа на прес-конференцијата, Спасов станал сопственик на нова компанија за производство на електрична енергија – „Гама солар“, а само по три дена Регулаторната комисија за енергетика, со одлука одобри и лиценца за изградба на фотоцентрала, под името „Гама солар1“.
„Па сосема логично е денес истата оваа агенција ’Рејтинг’, која беше добро исплатена преку милионски тендери од власта, да мисли дека ќе ѝ се оддолжи на СДС преку опозиција. Но, залудни се обидите преку низок ПР, СДС да се надева дека ќе успее да го поткрене сопственото реноме. Филипче мисли дека со креирани лаги ќе избега од одговори за сите катастрофи изминативе 7 години, но одговори и одговорност мора да има“,
рече Митева.