Рускиот парламент денеска го изгласа Михаил Мишустин за премиер на Русија.
Путин вчера го назначи за нов премиер Михаил Мишустин, шефот на руската даночна администрација, кој е малку познат во јавноста.
Михаил Владимирович Мишустин е економски политичар кој од 2010 година ја извршува функцијата шеф на Федералната даночна служба.
Роден е на 3 март 1966 година и дипломирал на Московскиот универзитет за машинство каде што ги завршил постдипломските студии. Во 1998 година тој се приклучува на државната служба како асистент за системите за сметководство и информации за плаќање данок во Сојузната даночна служба.
Потоа, работел како заменик-министер на Руската Федерација за даноци и такси, бил раководител на Федералната агенција за катастар и недвижнини под Министерството за економски развој и раководител на Федералната агенција за управување со посебни економски зони.
Мишустин беше еден од иницијаторите за отворање на Државното високо економско училиште, Институт за економија на недвижнини и во 2008 година поднесе оставка од државната служба за две години да работи во „УФГ капитал“.
Во април 2010 година е именуван за директор на Федералната даночна служба.
Мишустин ќе го наследи Дмитриј Медведев кој вчера поднесе оставка од функцијата премиер, како дел од уставните промени што ги најави Путин во традиционалниот годишен говор.
Рускиот претседател во обраќањето предложи уставни измени со кои парламентот би добил поголеми ингеренции – парламентот да има право да го именува премиерот, право што сега го има претседателот. Меѓутоа, разрешувањето на премиерот и натаму ќе биде право на претседателот.
Уставните промени предвидуваат можност Путин да остане на власт и по истекот на вториот претседателски мандат во 2024 година, нешто што во моментов Уставот на Русија не го дозволува.
Како што јавуваат руските медиуми, Медведев веројатно ќе добие нова функција – заменик-шеф на Советот за безбедност на Русија.