Оттаму нагласуваат дека извршителите се должни да го применуваат Кодексот на професионална етика кој претставува збир на пишани стандарди за однесување и постапување на извршителите во рамките на својата дејност, односно примена на Законот за извршување
Министерството за правда побарало од Комората на извршители да го испита случајот во кој извршителката Весна Јакимовска го нападна новинарот Фуркан Салиу и доколку утврди законски пречекорувања, да преземе соодветни мерки.
„Министерството за правда побара од Комората на извршители да го испита случајот поврзан со новинар, а во кој е инволвиран извршител од Гостивар и доколку постои евентуално пречекорување на Законот за извршување и Кодексот на професионалната етика на извршителите, да се преземат соодветни мерки. Како Министерство за правда посочуваме дека извршителот е должен во однесувањето кон јавноста да постапува покажувајќи афирмација и уважување на дејноста извршител, да не се однесува навредливо, да биде трпелив, достоинствен и учтив, како и да ги почитува странките и нивното достоинство“,
се наведува во соопштението на Министертсвото за правда.
Оттаму нагласуваат дека извршителите се должни да го применуваат Кодексот на професионална етика кој претставува збир на пишани стандарди за однесување и постапување на извршителите во рамките на својата дејност, односно примена на Законот за извршување.
Основното јавно обвинителство (ОЈО) Кичево денеска информираше дека повело постапка и предложило мерка притвор за 60-годишната извршителка Весна Јакимовскa поради сомнение дека сторила низа кривични дела во текот на вчерашниот ден.
Извршителката е осомничена дека најпрво физички нападнала службено лице – новинар и ја оштетила неговата опрема додека тој се обидувал да сними изјава од неа во врска со нејзиното постапување по конкретен предмет на извршување. Откако по нападот на новинарот била повикана да даде исказ во полициска станица, осомничената физички нападнала полициски службеник и го уништила изготвениот службен материјал.
„ОЈО Кичево поведе постапка против извршителка за која постои основано сомнение дека во стек ги сторила кривичните дела – Спречување на службено лице во вршење службено дејствие од член 382 став 3 во врска со став 1, Напад врз службено лице при вршење работи на безбедноста од член 383 став 2 во врска со став 1 и Фалсификување или уништување деловни книги од член 280 став 2 од Кривичниот законик“,
се наведува во известувањето од Обвинителството.
Од ОЈО Кичево додаваат дека притворот за извршителката е предложен бидејќи во текот на целиот настан таа продолжила да се заканува поради што, како што посочуваат, јасно постои опасност од повторување на делото.
Инаку, нападот на Јакимовска врз полицаец од станицата во Кичево беше регистриран и во билтенот на МВР со вчерашен датум. Во полициската информација, меѓу другото, беше наведено дека извршителката била уапсена од страна на кичевската полиција синоќа околу 23 часот.
Новинарот Фуркан Салиу од „Портал икс“ вчера на социјалните мрежи информира дека бил физички нападнат од извршителката Весна Јакимовска додека заедно со екипа од својот медиум ја извршувал работната задача, односно снимал продолжение на серијалот истражувачки стории во врска со нејзината работа.