Одговорот за пројавување интерес меѓународните финансиски институции и странските комерцијални банки треба да го достават до крајот на овој месец, со можност за продолжување на рокот по барање на банките
Министерството за финансии денеска испрати барање до 21 меѓународна финансиска институција и странски комерцијални банки за покажување интерес за финансирање на проектот за изградба на брза пруга вдолж Коридорот 10.
Износот што се бара за реализација на проектот, како што информира ресорното министерство, е 1,91 милијарда евра.
Станува збор за финансиски институции од Европа, САД, Јапонија и Обединетото Кралство, од кои дел се институции со кои земјата и претходно соработувала на одредени проекти.
„Барањето е доставено до Светска банка, Европската банка за обнова и развој, Европската инвестициска банка, Фондот за меѓународен развој на ОПЕК, Француската развојна агенција, КФВ Развојната банка, Италијанската развојна банка, Јапонската агенција за меѓународна соработка, германската ДЗ банка, Морган Стенли, Уни кредит Банка Австрија, Сити банк, ЏП Морган, Дојче банк, Сосиете Женерал, Рајфајзен банк, ЕРСТЕ банк, Банка ИМИ, британската Стандард чартерд, Банка на Америка, јапонската МУФГ банка, како и американската Голдман Сакс“,
се вели во соопштението од ресорното министерство.
Согласно испратеното барање, како што информираат од Финансии, одговорот за пројавување интерес меѓународните финансиски институции и странските комерцијални банки треба да го достават до крајот на овој месец, со можност за продолжување на рокот по барање на банките.
Министерството за финансии го испраќа барањето за пројавување интерес со меѓународните финансиски институции врз основа на Заклучок на Владата и врз основа на законските прописи, односно Законот за јавен долг.
Заедно со барањето Министерството за финансии испраќа до меѓународните финансиски институции и банките и образложение за проектот подготвено од Министерството за транспорт и врски и „МЖ инфраструктура“, а кое исто така е разгледано од страна на Владата.
Премиерот Христијан Мицкоски денеска изјави оти очекува годинава да почне изградбата на брзата пруга која е дел од Коридорот 10.
„Ако сè биде како што треба, оваа година очекувам почеток на изградбата на оваа пруга, а тоа ќе значи многу во историска и во транспортна смисла“,
рече тој при денешната посета на Битола.
Министерката за финансии Гордана Димитриеска-Кочоска вчера најави дека најдоцна до денешниот ден ќе се пуштат писма до банките што би доставиле понуди за финансирање на проектот брза пруга од Коридорот 10.