Од ресорното министерство преку соопштение се обратија до јавноста велејќи дека без исполнување на највисоките светски стандарди и без претходно одобрение од страна на локалното население, дозвола за отворање рудник во Иловица нема да има
Вчерашната објава на одлуката за спојување на двете концесии за рудникот кај струмичкото село Иловица во „Службен весник“ на маса повторно го врати спорното прашање за кое екологистите и локалното население во струмичкото село водеа неколкугодишни битки со државата.
Според одлуката, се спојуваат концесијата за експлоатација на злато и бакар во с. Иловица во Општина Босилево заедно со концесијата за експлоатација на минерална суровина злато и бакар во Општина Босилево и Општина Ново Село.
Екологистите во изјава за Телма велат дека оваа одлука се коси со нивните барања и се сомневаат дека зад донесувањето на одлуката стои политичката партија ДУИ. Тие реагираа уште пред половина година кога излезе информацијата дека оваа компанија купила акции од концесионерот „Еуромакс“.
И додека активистите обвинуваат дека ДУИ тргнува во офанзива за рудникот, од Министерството за економија, чиј министер е кадар на истата партија, велат дека концесија за ископување минерални суровини нема да има, барем не додека на такво нешто не се согласат жителите на селото, но и додека не се исполнат највисоките стандарди.
„Дозвола за експлоатација нема да биде издадена и без претходни консултации и сослушување на ставовите на локалното население, што е и законски редовна постапка при издавање на решение за одобрување на студија за заштита на животната средина, без која не може да се издаде дозволата. И ова се однесува не само на дозвола за експлоатација во Иловица туку и за отворање на кој било друг рударски капацитет во Република Северна Македонија“,
се вели во соопштението на економија.
Утринава од партијата ДОМ, која е дел од власта, побараа од Владата, но и од општините Босилево и Ново Село да не дозволат изградба на рудникот.
Прашањето за отворање рудник во оваа област се отвори пред неколку години, кога тогашната влада донесе одлука за експлоатација на минерали во овој регион, но со текот на годините локалното население, но и екологисти од земјава во неколку наврати излегоа на протести против отворање на ваков рудник велејќи дека на овој начин ќе се уништи еколошката рамнотежа во регионот.
Инаку, според проценките на експерти, во Иловица се наоѓаат 69,5 тони злато и 411 илјади тони бакар.