Министерството за економија да ги поништи тендерите за медиумска кампања бидејќи закупот на медиумски простор е спротивен од заклучок на Владата од 22 август 2017 година, со кој се обврзува да престане со рекламни кампањи преку медиумите.
Вакво барање упатуваат неколку новинарски здруженија и организации преку заедничко соопштение: Здружението на новинарите на Македонија (ЗНМ), Самостојниот синдикат на новинари и медиумски работници (ССНМ), Македонскиот институт за медиуми (МИМ) и Советот за етика во медиумите (СЕММ).
Од овие организации потсетуваат дека според описот на јавната набавка целта е да се склучи договор со приватна фирма за сума од околу 200 000 евра, која потоа ќе ги изработи овие стратегии и ќе им плати на онлајн-медиуми пари за кампања за промоција. Меѓутоа, тие реагираат дека Владата се обврза да ги прекине кампањите уште пред речиси 4 години.
„Праксата за закуп на медиумски простор е забранета и во спротивност со Заклучокот на Владата од 24-та седница од 22.8.2017, a во согласно со мерката 6.1.2. од Планот 3-6-9, која се однесува на стопирање со владините реклами. Со овој заклучок се обврзуваат државните органи да престанат да емитуваат/рекламираат кампањи/спотови на платен простор во електронски комерцијални радиодифузери – телевизии и радија, дневни и неделни весници, билборди, интернет портали и сл. (со исклучок на социјалните медиуми)“,
пишува во соопштението од партнерските организации.