Од Министерството додаваат и дека се бара решение за надминување на проблемот со постапката за увоз на детски играчки, козметички производи и предмети за општа употреба
Државниот санитарен и здравствен инспекторат (ДСЗИ) веќе постапува согласно констатираните забелешки и препораки во извештајот за извршена ревизија на финансиски извештаи и ревизија на усогласеност за 2024 година на ДСЗИ, изготвен од Државниот завод за ревизија (ДЗР), соопштија попладнево од Министерството за здравство (МЗ).
Од Здравство велат дека до сите подрачни одделенија веќе биле дадени насоки забелешките што се однесуваат на инспекциските надзори во иднина да бидат коригирани.
Во однос, пак, на забелешките што се однесуваат на Одделението за човечки ресурси, од Министерството велат дека во тек е комплетирање на документацијата.
Оттаму додаваат дека во делот на материјално-сметководствено работење, забелешките се од административно-техничка природа и, имајќи предвид дека ДСЗИ од 1.1.2025 година е орган во состав на Министерството за здравство, веќе се преземени мерки за отстранување на констатираните забелешки.
Од Министерството додаваат и дека се бара решение за надминување на проблемот со постапката за увоз на детски играчки, козметички производи и предмети за општа употреба.
„Во однос на постапката за увоз на детски играчки, козметички производи и предмети за општа употреба и забелешката за сертификатите за безбедност што се приложуваат при увоз, веќе се отпочнати иницијални преговори со релевантните чинители за изнаоѓање заедничко прифатливо решение, со цел да се надмине овој проблем“,
пишува во соопштението од Здравство.
Државниот завод за ревизија денеска го објави конечниот извештај за Државниот санитарен и здравствен инспекторат за 2024 година. Во извештајот се констатира дека на рафтовите во продавниците во земјава постои ризик да се најдат козметички производи и детски играчки што во себе содржат забранети супстанции.
Дополнително, ревизорот констатирал и други слабости во однос на инспекциските надзори што ги спроведува Државниот санитарен и здравствен инспекторат, а кои се однесуваат на фактурите и здравствените сертификати.
Во извештајот на ДЗР е нотирана и екипираноста на Државниот санитарен и здравствен инспекторат, која ниту оддалеку не ги задоволува потребниот квантум на кадри.