Во интервјуто го критикува и пратеникот на ВМРО-ДПМНЕ од Кочани, Миле Лефков, за кој посочи дека нема излезено на ниту еден марш на родителите за загинатите, иако им бил професор на голем дел од жртвите
Јавноста во Кочани будно ќе го следи судскиот процес за трагедијата што се случи во градот и нема да дозволиме да се тргува со жртвите. Ова го изјави в.д. градоначалникот на Кочани, Венко Крстевски во интервју за Радио Слободна Европа (РСЕ), посочувајќи дека наместо да се подобрува состојбата во градот, таа се влошува, бидејќи е создадена институционална криза.
Посочи дека за него е иритирачки што за трагедијата во Кочани во која загинаа 62 лица никој не поднесе оставка, ниту, пак, понесе морална одговорност.
„Ние не видовме морална одговорност од никој. Па, зар некој не требаше да каже: сам си поднесувам оставка од морални причини. Еве, претходниот градоначалник на Општина Кочани, господинот Љупчо Папазов, немаше ни храброст да излезе да си поднесе оставка, туку тоа го направи со статус на Фесбук. И прашање е колкаво влијание има неговата желба да си поднесе оставка, бидејќи информациите што ги имам е дека на денот кога поднесува оставка, сабајлето имал брифинг со вработените во општината и ништо не им најавил. Тој ја поднесува оставката подоцна. Значи нешто се има случено во меѓувреме. На Феејбук напиша оставка“,
вели Крстевски.
Според него, најголема морална одговорност има министерот за внатрешни работи, Панче Тошковски.
„Јас не велам дека негова е правно формално одговорноста. Но, тој и те како има одговорност, како една година министер, најмалку од се да биде позитивен политички пример дека мора некогаш да почне да се сниси морална одговорност“,
кажа в.д. градоначалникот на Кочани.
Во интервјуто го критикува и пратеникот на ВМРО-ДПМНЕ од Кочани, Миле Лефков, за кој посочи дека нема излезено на ниту еден марш на родителите за загинатите, иако им бил професор на голем дел од жртвите.
Крстевски го повика и премиерот Христијан Мицкоски да се појави во Кочани.
„Јас сум разочаран што се уште премиерот нема дојде нов Кочани и во неколку наврати го повикав лично. Вратата во Општина Кочани за него е отворена, бидејќи тој е пример на сите граѓани на оваа држава и само со помош на централната власт можеме да го издигнеме градот во следниот период. Таа помош е неминовна и тие имаат должност кон нашиот град за да помогнат. Исто важи и за пратеникот. Не видовме дека има некакви комуникации со жртвите“,
вели градоначалникот на Кочани.
Родителите на загинатите во пожарот во т.н. дискотека „Пулс“ вчера го одржаа единаесеттиот „Марш за ангелите“ во Кочани. Побараа одговорност од институциите што не постапувале на време.
Државниот јавен обвинител Љупчо Коцевски на 13 јуни годинава соопшти дека е поднесено обвинение против 34 физички и три правни лица за пожарот во т.н. кабаре „Пулс“ во Кочани. Сите обвинети се товарат за кривичното дело тешки дела против општата сигурност, со исклучок на еден, кој е обвинет за примање мито за изготвување на лажните лиценци за да може објектот да функционира како кабаре-клуб.
Иако првично бројот на осомничени во истрагата беше поголем и изнесуваше околу 50 лица, за дел од нив постапките се прекинати бидејќи во текот на истрагата не се обезбедени докази.