Целта на посетата, соопшти МНР, е унапредување на билатералните односи меѓу Северна Македонија и Јапонија, со посебен акцент на економската соработка и бизнис-релациите. Oд Токио, пак, Османи ќе отпатува за Вашингтон, каде што ќе ја предводи владината делегација во рамките на Стратешкиот дијалог меѓу Северна Македонија и САД
Шефот на дипломатијата, Бујар Османи денеска и утре ќе престојува во работна посета на Јапонија, на покана на неговиот јапонски колега Јошимаса Хајаши, соопшти Министерството за надворешни работи.
Покрај средбата со Хајаши, Османи ќе биде примен и од престолонаследникот на Јапонија, принцот Акишино, а ќе има и одвоени средби со спикерите на Домот на претставници и Домот на советници при парламентот на Јапонија, Хиројуки Хосода и Акико Санто.
„Министерството за надворешни работи информира дека Османи ќе организира бизнис-форум со Јапoнската организација за надворешна трговија (ЈЕТРО), на кој ќе ги презентира поволностите за инвестирање во Северна Македонија пред истакнати јапонски компании како ‘Хонда’, ‘Митсубиши’, ‘Нипон Коеи’… Дополнително, министерот Османи ќе оствари средба и со министерот за ‘Осака ЕКСПО 2025’, Кенџи Вакамија“,
додаваат од Министерството.
Целта на посетата, соопшти МНР, е унапредување на билатералните односи меѓу Северна Македонија и Јапонија, со посебен акцент на економската соработка и бизнис-релациите.
„Воедно, ќе бидат разменети мислења за актуелната безбедносна состојба во европскиот континент и Индопацификот, надворешно-политичките приоритети на двете земји, како и за актуелните меѓународни прашања и регионални теми“,
информираат од МНР.
Министерството информира дека од Токио, Османи ќе отпатува за Вашингтон, каде што ќе ја предводи владината делегација во рамките на Стратешкиот дијалог меѓу Северна Македонија и САД.