Таа ќе присуство на голем трговски состанок, а ќе има средби и со вицепремиерот за европски прашања, Никола Димитров, шефот на дипломатијата, Бујар Османи, и министерот за животна средина, Насер Нуредини, како и со граѓански и медиумски организации
Министерката за Европа и Америка на Обединетото Кралство, Венди Мортон, денеска (13 октомври) треба да пристигне во дводневна посета на Северна Македонија за да учествува на голем трговски состанок.
„Таа ќе присуствува на првиот состанок на советот во рамките на Договорот за партнерство, трговија и соработка (ДПТС) во Министерството за надворешни работи, што ќе ги зајакне трговските врски меѓу Обединетото Кралство и Северна Македонија“,
најавија од британската амбасада во земјава.
Во пресрет на состанокот, Мортон вели дека за неа е задоволство да присуствува на него и истакнува дека договор кој Северна Македонија и Обединетото Кралство го потпишаа во декември 2020 година – по излегувањето на Обединетото Кралство од ЕУ, претставува рамка за поблизок политички дијалог и засилено трговско партнерство.
„Исто така, овој договор го поддржува унапредувањето на соработката во полето на животната средина, образованието, човековите права и претставува можност за зајакнување на нашите безбедносни и културни врски“,
вели Мортон.
Покрај трговскиот состанок, британската министерка ќе има средби и со вицепремиерот за европски прашања, Никола Димитров, шефот на дипломатијата, Бујар Османи, и министерот за животна средина, Насер Нуредини.
Според најавата од амбасадата, таа ќе има посети и во рамки на проектот на Британскиот совет „Училишта за 21-от век“, а ќе се сретне и со граѓанските организации кои работат на заштитата на животната средина, промоцијата на човековите права, родовата еднаквост, вклучување на лицата со попреченост и со медиумиските организации.
„Исто така, ќе се разговара и за климатските промени во пресрет на конференцијата за климатски промени (COP26) која ќе се одржи во Глазгов и клучните реформски процеси со акцент на владеењето на правото, доброто владеење, човековите права, медиумите, образованието, родовата еднаквост и вклучувањето на лицата со попреченост“,
најавуваат од британската амбасада.
Ова ќе биде втора посета на Мортон на Северна Македонија. Претходно таа ја посети земја во 2020 година како дел од состанокот на министрите за надворешни работи во рамките на Берлинскиот процес.