На одбележувањето на 22-годишнината од загинувањето на десетте припадници на резервниот армиски корпус кај местото Карпалак на автопатот Скопје–Тетово, министерката за одбрана Славјанка Петровска изјави дека хероите кои ги дадоа своите животи за одбрана на татковината заслужуваат достоен споменик на кој ќе може да им се оддаде почит
Министерката за одбрана на С Македонија, Славјанка Петровска, од Карпалак порача дека херојството на прилепските припадници на Армијата кои загинаа во заседа никогаш нема да биде заборавено и тие ќе останат во вечно сеќавање како херои кои за татковината го дадоа најскапоценото – животот.
„22 години поминаа, но со голема тежина во срцето, од трагичниот настан на Карпалак каде животот го загубија десетте херои на безбедносните сили. Тие несебично се одзваа на повикот на татковината и тоа никогаш нема да биде заборавено. Длабока почит и сочувство до нивните семејства. Вашите синови ќе ги паметиме вечно како херои кои за татковината го дадоа најскапоценото“,
рече Петровска.
Како и секоја година, така и оваа, едно од главните прашања беше дали ќе се изгради спомен-плоча која би била достојна за да се оддаде почит на паднатите борци, бидејќи сега единствен потсетник е малата плоча која стои на банкина покрај самиот пат, а која честопати во минатото беше мета на вандализам. Министерката Петровска се сложи со констатацијата дека тие заслужуваат достоен споменик и рече дека ќе испрати бгарање до Општина Желино за дозвола за изградба на споменик, кој би бил целосно финансиран и реализиран од страна на Министерството за одбрана.
Масакрот кај Карпалак се случи на 8 август 2001 година, кога конвој од Прилепската касарна одел кон Тетово. На пат кон Тетово, кај месноста Карпалак, конвојот бил пресретнат во терористичка заседа и врз него бил отворен жесток оган. Во масакрот загинаа 10 припадници на резервниот состав на АРМ – Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски.