Министерството за труд и социјална политика очекува да најде соодветно решение за тоа како да се дефинира минималната пензија во државата која ќе биде над прагот на сиромаштија до крајот на годината
Министерката за труд и социјална политика, Јованка Тренчевска вели дека работната група која би требало да се формира во најскор можен рок ќе работи на решавање на прашањето за минимална пензија, односно ќе се разгледува дали ќе се носи Закон или ќе има измени на Законот за пензиско за да се утврди износ на минимална пензија која не би ја довела во прашање сигурноста и стабилноста на Фондот за пензиско и државните капацитети
„Нè очекува ново усогласување со септемвриската пензија. Ги очекуваме деновиве податоците од Заводот за статистика, врз основа на ова ќе го знаеме точниот процент за усогласување на пензиите на сите пензионери“,
вели Тренчевска.
Таа очекува до крајот на годината да се најде соодветно решение за тоа како ќе се дефинира минималната пензија која би била над прагот на сиромаштија.
„Законското решение коешто е во моментот и при носењето на новата методологија во 2022 година сите пензионери се согласија, вели дека 50 проценти од трошоците на живот и 50 проценти од порастот на просечната плата, во изминатото полугодие, во однос на она што му претходело. Очекуваме да ги добиеме податоците и врз основа на нив ќе видиме колку ќе биде. Можно е шест, можеби нешто повеќе, сè зависи од статистиката“,
изјави Тренчевска.
Министерката вели дека барањето на пензионерите за минимална пензија од 18 000 денари е нереална сума, бидејќи во државата минималната плата изнесува 20 000. Вели, доколку се утврди минимална пензија од тој износ, тогаш Фондот за пензиско ќе биде оптоварен и можно е државата да се доведе во ситуација да после неколку месеци, да нема пари да ги исплати пензиите на сите 330 000 пензионери.