Францускиот амбасадор во земјава Кристоф Ле Риголер, кој, исто така, се обрати на денешниот настан организиран од Министерството за јавна администрација, ја потврди поддршката од Франција за реформите во јавната администрација, нагласувајќи дека нејзината модернизација е клучна не само за европската интеграција, туку и за граѓаните
Со формирањето на Академијата за стручно усовршување и обука на административните службеници за прв пат во историјата на државата, системски и институционално ќе се регулираат стручните обуки на јавните службеници, што ќе постави нови стандарди на јавната служба. Ова денеска го кажа ресорниот министер, Горан Минчев, во своето обраќање на јавната дискусија, организирана од Министерството за јавна админстрација, на тема „Имплементација на Законот за стручно усовршување и обука на административните службеници.
Говорејќи во таа насока, министерот рече дека со отворањето на Академијата, секој административен службеник, од најмладиот до најискусниот, ќе има можност да се надградува, да стекнува нови знаења и да го покаже својот професионален капацитет.
За Законот за стручно усовршување и обука, на кој заснова формирањето на Акаедмијата, Минчев рече дека со него се поставуваат нови страндарди во јавната служба.
„Со формирањето на Академијата, која ќе се структуира во рамките на овој француско-македонски проект, создаваме институција која ќе биде срцето на професионализацијата на јавната служба. Законот за стручно усовршување и обука на јавните службеници е суштинска промена. Промена што ја премостува децениската разлика меѓу желбата за европска администрација и реалноста што ја градиме денес – модерна, стручна и одговорна администрација,“
рече министерот.
Како што посочи тој, Академијата за јавна администрација, освен што ќе понуди структуирани обуки и развој на компетенции кај постојната администрација, предвидува и обука и полагање испит за новите кадри.
Имено, како што наведе, тој секој нововработен ќе треба да помине 120 часа обука и ќе полага испит пред стручна комисија.
„Ова е партнерство меѓу државата и нејзините луѓе, меѓу институцијата и службеникот, меѓу знаењето и јавниот интерес,“
рече министерот.
Францускиот амбасадор во земјава Кристоф Ле Риголер, кој, исто така, се обрати на настанот, ја потврди поддршката од Франција за реформите во јавната администрација, нагласувајќи дека нејзината модернизација е клучна не само за европската интеграција, туку и за граѓаните.
Реформата на јавната администрација, како што кажа тој, е неопходна за граѓаните кои очекуваат ефикасна, модерна и транспарентна администрација.
„Довербата во администрацијата е темел на довербата во демократијата“,
порача Ле Риголер.
Тој го најави проектот за поддршка на формирањето на Академијата, планирана за 2027 година, и подвлече дека Франција ќе го стави на располагање најдоброто од својата експертиза.
„Обуката е суштинска, но уште поважно е да се изберат најдобрите, да се вреднува нивниот труд и да им се овозможи развој“,
додаде амбасадорот.
Извршната директорка на Центарот за управување со промени (ЦУП), Неда Малеска-Сачмароска, го нагласи значењето на културата на учење во институциите, повикувајќи на промена во перцепцијата на обуките.
„Не е доволна само Академијата, неопходно е да изградиме култура на учење, која ќе им овозможи на вработените да развиваат нови компетенции“,
рече Малеска-Сачмароска.
Таа предупреди дека обуките често се гледаат како формалност, а не како инвестиција, и повика раководните структури да ги третираат како вложување со највисок поврат.
„Инвестицијата во знаење е инвестиција во иднината на државата. Вработените треба да го доживуваат учењето не како обврска, туку како можност за личен и професионален развој“,
подвлече таа.