Според Милевски, до крајот на неделата се очекува неговата партија, Либерално-демократската партија (ЛДП) да предложи нов кандидат кој ќе ја извршува функцијата министер за локална самоуправа. Можноста новиот министер да биде некој од пратениците е исклучена, додава тој
Министерот за локална самоуправа Горан Милевски во изјава за МИА информира дека утре ќе поднесе оставка до Владата. Според него, до крајот на неделата се очекува неговата партија, Либерално-демократската партија (ЛДП) да предложи нов кандидат за министер.
„Се исклучува можноста тоа да биде некој од пратениците“,
изјави Милевски за МИА.
Повлекувањето од министерската функција, како што посочи, е поради лични причини.
Горан Милевски e член на Либерално-демократската партија од 1995 година, а од 2015 година ја извршува функцијата претседател на ЛДП. За министер за локална самоуправа, пак, е избран на 27 јуни 2019 година.
Минатата недела Милевски потврди дека ќе се повлече од министерската функција, а во изјава за „Локално“ изјавил дека после 3-годишно извршување на функцијата министер за локална самоуправа, време е за промени и на ова место да дојде друг кадар од ЛДП.
,,Фокус“ претходно објави дека Милевски се повлекува – прво од министерската функција, додека партиската, според наведеното, ќе ја извршува до следниот редовен конгрес што треба да се одржи до крајот на годинава.
Неофицијално, според ,,Фокус“, најсериозен кандидат за нов лидер на либералдемократите е потпретседателката Моника Зајкова, која е еден од двајцата пратеници на ЛДП. Во конкуренција за нов министер од редовите на ЛДП, пак, според ,,Фокус“ се двајца кандидати, меѓу кои е и поранешниот лидер и градоначалник на Скопје, Ристо Пенов.