„Им посакувам на Македонија, на Македонците и на политичарите во Македонија сè најдобро и сами да проценат, без туѓо менторство и уште полошо, без туѓа манипулација и управување со видливото и невидливото, што е добро за нив“, порача хрватскиот претседател за време на средбата со Гордана Сиљановска-Давкова во Загреб
Има живот и без Европската Унија и тој е успешен и достоинствен – изјави претседателот на Хрватска, Зоран Милановиќ, за време на средбата со македонската претседателка Гордана Сиљановска-Давкова, која е во официјална посета на Загреб. Милановиќ го коментираше долготрајниот процес на пристапување на Северна Македонија кон ЕУ, нагласувајќи дека на земјата ѝ се поставуваат премногу барања и услови.
Во оваа смисла хрватскиот претседател рече дека Северна Македонија сама одлучува за својот пат.
„Македонија сама одлучува што е најдобро за неа и кој пат ќе го избере – дали е тоа е патот на просперитет, мир и спокојство за граѓаните на Македонија или вториот, вклучувајќи ги ЕУ и НАТО, кој е фасада, еден вид енергетска обнова. Но, она што ја прави куќата е внатрешноста. Ова е мое мислење, а не совет. Ова важи и за Хрватска, ЕУ е доградба, но никако зграда. Нашата куќа и традиција се на нашата земја, а ЕУ е добредојдена сезонска приказна додека трае. Тоа е тоа. Има живот и без ЕУ, и тој е успешен и достоинствен“,
рече Милановиќ.
Тој смета дека земјава треба сама да одлучи за својата судбина и за тоа што е важно за неа – дали е тоа членство во ЕУ по секоја цена бидејќи, како што рече, она што се бара од Скопје во последно време е „по секоја цена“ и повеќе од тоа. Сиљановска-Давкова и Милановиќ се согласни дека патот на земјава кон ЕУ е неоправдано попречуван и дека од неа се бараат отстапки кои ниту се оправдани, ниту се дел од Копенхашките критериуми.
„Им посакувам на Македонија, на Македонците и на политичарите во Македонија сè најдобро и сами да проценат, без туѓо менторство и уште полошо, без туѓа манипулација и управување со видливото и невидливото, што е добро за нив, бидејќи тоа се случува предолго. Пред пет, шест, седум години, не би го кажал ова. Денес го кажувам ова затоа што го гледам. Значи, има живот без Европската Унија, и тоа успешен и целосно достоинствен живот“,
додаде Милановиќ.
Претседателката Гордана Силјановска-Давкова рече дека земјава се соочува со огромен притисок од Европската Унија за промена на Уставот.
„Замислете, актот на сувереноста, Уставот, највисокиот закон, закон на законите, општествената повелба на граѓаните треба да се смени. Иако како и во секој устав, и во нашиот пишува дека иницијатива за промена може да покренат претседателот, 30 пратеници, или 150 илјади граѓани, не пишува дека Европската Унија, а уште помалку некој од соседите може да го направи тоа“,
рече претседателката на државата.
Наместо барања согласно Копенхашките критериуми, додаде таа, Македонија добива барања што се однесуваат на историјата, културата, јазикот или на идентитетот. Во оваа смисла Сиљановска-Давкова рече дека сè уште се надева оти земјава ќе добие можност да се натпреварува рамноправно со другите за место во европското семејство во поглед на владеењето на правото, демократијата, почитувањето на човековите права.