„Христијан грешиш, а очекувано е да грешиш кога те фаќа паника и мора да се правдаш и да смислуваш приказни за да ги оправдаш грешките. Грешиш како што грешеше постојано овие три години. Твоите грешки, за жал ги плаќа ВМРО ДПМНЕ , а тие резултираа со два изборни порази на претседателските и парламентарните избори, а ги загуби и локалните избори во Охрид и во Ново Село. На сите овие избори, вклучително и на последните ти си тој што директно одработи за СДСМ“, му одговари Сашо Мијалков на Христијан Мицкоски за прозивиките во интервјуото за Сител – дека тие што го критикуваат се партнери на Заев.
Во својот статус објавен на Фејсбук, Мијалков му укажува на Мицкоски дека на СДСМ најмногу им одговара тој да остане на чело на паријата.
„Доколку оставиме на Заев и СДСМ да бираат, ќе те изберат тебе за уште десет пати по ред да те згазат на избори, а ти да ја бараш вината за поразите на друго место, а не во себе и луѓето со кои соработуваш. Ти и сите околу тебе кои се борат да останеш претседател, се тие коишто одработуваат за Заев, затоа што со тебе на чело, ВМРО ДПМНЕ никогаш нема да се врати на победничка патека, а тоа е единствено во интерес на Заев и СДСМ. Човек што разединува и не ја бара одговорноста во себе, нема лидерски капацитет“,
му пишува Мијалков на Мицкоски.
Според Мијалков, на парламентарните избори Мицковски и неговите соработници излегле со лоша кадровска и програмска понуда, која не можела да ги привлече неутралните избирачи.
„Дали кандидатите за пратеници кои ти ги избра повлекоа поголем број гласови или го оствари најслабиот резултат во историјата? Дали ти како ‘шпицен’ кандидат успеа да го достигнеш барем последниот резултат на ВМРО ДПМНЕ од 2016 година или освои 150 000 гласови помалку“,
прашува Мијалков.
Сепак, поранешниот директор на УБК и висок партиски функционер во ВМРО-ДПМНЕ му дава максимална поддршка на Мицкоски да состави влада и, како што вели, „во судиското продолжение да го сврти резултатот“.
„Доколку го сториш тоа, јас ќе бидам првиот кој ќе ти честита. Доколку не успееш, тогаш ќе мора да понесеш одговорност затоа што му овозможи на СДСМ повторно да формира влада“,
укажува Мијалков.
На крајот од објавата, Мијалков му сугерура на Мицкоски дека барањето одговорност од него и неговиот тим, не е напад на ВМРО ДПМНЕ.
„Обиди се да ја надминеш суетата. Не се поистоветувај со партијата. Не те личи. На ВМРО ДПМНЕ ќе му тргне тогаш кога ќе добие сериозно лидерство“,
му порачува Мијалков на Мицкоски.