МИА објавува дел од Извештајот на ЕК: Одлагањето на преговорите негативно влијае врз Северна Македонија и врз кредибилитетот на ЕУ

Европската комисија е задоволна што Северна Македонија продолжува да ги исполнува критериумите за зачленување на ЕУ и што властите покажуваат јасна проевропска ориентација

Исто така, се поздравува делот на усогласувањето на надворешната политика на С Македонија со онаа на ЕУ со стапка од 96 отсто, што претставува зголемување од два процентни поени во споредба со 2020 година

МИА дојде до делови од извештајот на ЕК за Северна Македонија кој ќе биде официјално објавен попладне во Европскиот парламент. Во него Европската комисија ја критикува блокадата за старт на преговори, јави МИА од Брисел.

Европската Комисија е задоволна што Северна Македонија продолжува да ги исполнува критериумите за зачленување на ЕУ и што властите покажуваат јасна проевропска ориентација.

„Северна Македонија продолжува да ги исполнува условите за отворање на преговорите за членство и властите ја демонстрираа јавно својата цврста заложба да продолжат по ЕУ патот. Земјата задржа постојан и одлучен тек во напредувањето на ЕУ реформите и ги зголеми своите напори за испорачување на опипливи резултати и натаму“,

се наведува во извештајот за реформскиот напредок за Северна Македонија, кој ќе биде објавен во 15 часот попладне во Стразбур.

Еврокомесарот за проширување Оливер Вархеји ќе го презентира извештајот пред пратеници од Комисијата за надворешни работи на Европарламентот.

Денеска ќе биде објавен Извештајот на ЕК за реформскиот напредок на Северна Македонија

Извештајот понатаму ќе гласи дека ЕУ-реформите се процес на долг рок кој бара постојан ангажман од владата и од опозицијата, како и од сите општествени чинители.

Исто така, се поздравува делот на усогласувањето на надворешната политика на С Македонија со онаа на ЕУ со стапка од 96 отсто, што претставува зголемување од два процентни поени во споредба со 2020 година.

„Во март 2020 членовите на Европскиот Совет едногласно ја одобрија одлуката да се отворање преговорите за членство со Северна Македонија. Одлагањата во официјалниот старт на преговорите за членство имаат негативни последици врз кредибилитетот на ЕУ“,

предупредува Европската комисија.

Се нагласува дека билатералните прашања помеѓу Софија и Скопје мора приоритетно да бидат решени.

„Комисијата со нетрпение очекува и ја истакнува важноста од постојано имплементирање на Договорот од Преспа и Договорот за пријателство, добрососедство и соработка со Бугарија од сите страни. Во согласност со заклучоците на Советот, Комисијата ја продолжува потребната подготвителна работа и очекува првата Меѓувладина конференција да се одржи што поскоро штом се усвои преговарачката рамка од страна на Советот и пред крајот на оваа година“,

бара Европската комисија.