Со донесениот Закон се скратуваат роковите во кои субјектите од јавниот сектор, чии сметки се во рамките на трезорот на Министерството за финансии, како и трезорот на Фондот за здравствено осигурување, се должни да ги поднесат барањата за плаќање на достасаните фактури кон економските оператори
Државата го намалува рокот за намирување на обврските кон приватните компании и тој постепено ќе се сведе на 30 дена. Од сегашните 60 дена рокот првично се намалува на 50 дена, од 1 јануари 2024 дополнително ќе се намали за уште 10 дена и ќе изнесува 40 дена, и од јануари 2025 година тој ќе биде 30 дена. Законските измени со кои се регулира ваквата обврска ги подготви Министерството за финансии, а ги усвои Собранието во рамки на 117. седница.
„Со донесениот Закон се скратуваат роковите во коишто субјектите од јавниот сектор, чии сметки се во рамките на трезорот на Министерството за финансии, како и трезорот на Фондот за здравствено осигурување, се должни да ги поднесат барањата за плаќање на достасаните фактури кон економските оператори до трезорот на Министерството за финансии и до трезорот на Фондот за здравствено осигурување, како и роковите во кои Министерството за финансии, односно Фондот за здравствено осигурување ќе ја вршат исплатата на средствата на кои гласат доставените фактури“,
се наведува во соопштението од Министерството за финансии.
Скратување за 30 дена ќе има и на плаќањата на јавниот сектор чии сметки се во рамки на Трезорската сметка на Фондот за здравствено осигурување на Македонија, кои сега се 90 дена. Со предложените измени се предлага од обврски на овие субјекти да се плаќаат за 80 дена, од јануари 2024 година за 70 дена, и од јануари 2025 година за 60 дена.
Министерот за финансии Фатмир Бесими вели дека на ваков начин се создава предвидливост за компаниите и се поддржува ликвидноста на стопанството, а тоа, како што вели, е особено значајно за компаниите во услови на економска криза.
Измените претставуваат усогласување со Директивата 2011/7/ЕУ на Европскиот парламент и на Советот од 16 февруари 2011 година за сузбивање на задоцнето плаќање при трговски трансакции, каде што роковите за израмнување на обврските на субјектите од јавниот сектор се 30 дена, а во здравствениот сектор се 60 дена.
Законот за финансиска дисциплина кој се применуваше досега е на сила од мај 2014 година и со него се обезбедува сигурна наплата на побарувањата и тој ја обезбедува ликвидноста на компаниите.