„Ве повикувам да застанете зад контингентот на Левица затоа што Левица е опозицијата на ВМРО-ДПМНЕ. Тоа го гледавме во Собранието година и пол, тоа го видовме и на овие избори. Ве повикувам да останете зад левата опција, за левиот блок да се консолидира и да може на секој можен начин да му задава удар на режимскиот ВМРО-ДПМНЕ“, им порача кандидатот за градоначалник на Скопје од Левица на гласачите од СДСМ
Кандидатот за градоначалник на Скопје од Левица, Амар Мециновиќ, кој во вториот круг од изборите освои двојно повеќе гласови од првиот изборен круг, им заблагодари на граѓаните за поддршката, оценувајќи дека и покрај победата на неговиот противкандидат од ВМРО-ДПМНЕ, Орце Ѓорѓиевски, Скопје на овие избори одлучило дека може да гласа и да избере поинаку.
Посебна благодарност Мециновиќ упати до неопределените гласачи кои се одважиле да гласаат, до гласачите на независните листи, како и до гласачите на СДСМ кои ги повика да застанат зад Левица.
„Сакам да им се заблагодарам и на гласачите на СДСМ. Сметам дека браната е пукната и дека ние сме вашата опција. Ве повикувам да застанете зад контингентот на Левица затоа што Левица е опозицијата на ВМРО-ДПМНЕ. Тоа го гледавме во Собранието година и пол, тоа го видовме и на овие избори. Ве повикувам да останете зад левата опција, за левиот блок да се консолидира и да може на секој можен начин да му задава удар на режимскиот ВМРО-ДПМНЕ“,
изјави Мециновиќ.
Најави дека Левица ќе се врати во парламентот уште посилна по овие избори, а на граѓаните кои гласаа за него им вети дека во следните две и пол години како пратеник во Собранието тој ќе биде нивниот глас.
„ВМРО-ДПМНЕ ќе добие уште пожестока борба од понеделник, а ние создадовме историја“,
порача тој.
Лидерот на Левица, Димитар Апасиев, упати слична порака и ги повика гласачите на СДСМ да застанат зад нив на наредните парламентарни избори и да ја победат ВМРО-ДПМНЕ.
„Во вториот круг Орце од Драчево има освоено плус 3 000 гласа, што е само 3 отсто зголемување додека Амар од Чаир има плус 30 500 гласа. Ова само покажува дека опозициските тенденции веќе се престројуваат позади Левица. Од втора партија на ниво на цело Скопје вечерва обзнанувам дека сме прва партија дури и пред ВМРО-ДПМНЕ во Центар, Карпош и во урбаниот дел од Аеродром“,
изјави Апасиев.