Во однос на состојбата во ПИОМ, Мемов порачува дека е стабилна и дека редовната исплата на пензиите не е под ризик
Фондот за пензиско и инвалидско осигурување не бара зголемување на старосната граница за пензионирање, вели директорот на ПИОМ, Никола Мемов. Во интервју за Радио Слободна Европа, тој посочува дека институцијата со која раководи, дава други предлози и мерки за поплнување на дупката, односно недостатокот на средства кој го пополнува Владата. Зголемувањето на старосната граница е стандардно барање коешто доаѓа континуирано од Светска банка, од ММФ и странските институции, вели Мемов.
„Владата се изјасни по основ на ова прашање и по основ на предлогот од фискалниот совет минатата година дека не го прифаќа тој модел на покачување на старосната граница и зголемување на стапката на придонес за 0,6% во наредните неколку години. И тие мерки не се составен дел од фискалната стратегија на Владата 2025-2029 година“,
вели Мемов.
Во однос на состојбата во ПИОМ, Мемов порачува дека е стабилна и дека редовната исплата на пензиите не е под ризик.
„Пензионерите може да бидат спокојни дека исплата на пензии секако дека ќе биде редовна и ние ги исплаќаме пензиите редовно на први во месецот. Во буџетот за 2026 година предвидени се околу 117 милијарди денари за исплата на пензии. Меѓутоа, предвидено е и исплата на здравственото осигурување на пензионерите, исто така и транзициските, практично трошоци кон пензиските друштва во вториот столб. За таа цел, за да биде системот заокружен и одржлив, Владата ќе обезбеди околу 62 милијарди денари, тоа е околу 1 милијарда евра, трансфери кон Фондот за пензиско и инвалидско осигурување за обезбедување навреме исплата на пензиите, на здравственото осигурување на пензионерите и транзициските трошоци кон вториот столб“,
додава Мемов.
Мемов потенцира и дека линеарното зголемување е за усогласување со животниот стандард. Според него тоа е исправно бидејќи цените подеднакво се покачени за сите.
„Аргументите што јас ги давам како директор на оваа институција, и тие се мои лични аргументи и ставови, се дека разликите за тоа кој колку уплаќал во Фондот по основ на придонеси за пензиско-инвалидско осигурување завршуваат со моментот за изготвување на решението за пензија. Тоа значи дека вие како осигуреник во текот на работниот век сте уплаќале одредена сума на средства преку придонесите за пензиско и вие имате повеќе уплатено средства. Јас како осигуреник имам помалку уплаќано средства во својот работен век. На денот на пресметка, разликите во пензијата се што вие имате Х-вредност поголема пензија од мене. И тука завршуваат сите тие разлики околу уплатата на придонесите и кој колку придонел во буџетот на Фондот за ПИОМ“,
потенцира директорот на ПИОМ.