„До септември 2025 година, истргувани се околу еден терават-час електрична енергија, што е над 21 отсто од националната потрошувачка и раст од над 40 проценти во однос на 2024 година, што е јасен показател за зголемена ликвидност и доверба“, вели Ѓорѓиевски
Македонскиот пазар на електрична енергија е стабилен, конкурентен и активно се подготвува за интеграција со европскиот пазар, рече управителот на Националниот оператор на пазар на електрична енергија, МЕМО ДООЕЛ Скопје, Зоран Ѓорѓиевски, на 14. Меѓународен форум за енергија за одржлив развој.
Ѓорѓиевски учествуваше на панел-сесијата „Енергетска поврзаност, отпорност и безбедност: регулаторни и правни аспекти“, каде што со колеги од берзите на Унгарија, Србија и Црна Гора, како и претставници на регулаторни тела, дискутираа за интеграцијата на Западен Балкан во електроенергетскиот пазар на ЕУ.
Ѓорѓиевски посочи дека има значаен напредок во развојот на транспарентен и ликвиден пазар од мај 2023 година, кога МЕМО го започнал пазарот „ден-однапред“:
Тој вели дека денес има 38 активни учесници – вклучувајќи ги речиси сите домашни производители и снабдувачи, како и повеќето регионални трговци.
„До септември 2025 година, истргувани се околу еден терават-час електрична енергија, што е над 21 отсто од националната потрошувачка и раст од над 40 проценти во однос на 2024 година, што е јасен показател за зголемена ликвидност и доверба“,
вели Ѓорѓиевски.
Ѓорѓиевски додава дека постигнатите цени реално ги одразуваат состојбите на понудата и побарувачката и се во корелација со регионалните пазари, што ѝ овозможува на Македонија своја референтна пазарна цена на електрична енергија – важен сигнал за идни инвестиции.
Управителот на МЕМО нагласи дека транспонирањето на регулативата од Electricity Integration Package е во финална фаза. По неговото усвојување, следува сертификација од Секретаријатот на Енергетската заедница и Европската комисија.
„Истовремено, усвојувањето на Market Coupling Implementation Plan од ACER е клучен чекор за започнување на ‘coupling’ проектите. Македонскиот пазар на електрична енергија е стабилен, конкурентен и активно се подготвува за интеграција со европскиот пазар“,
рече Ѓорѓиевски.
Според него, со новиот Закон за енергетика, МЕМО повторно е назначен како Номиниран оператор на пазарот на електрична енергија (NEMO) за следните четири години, обезбедувајќи институционална стабилност.
Покрај организираниот пазар, Ѓорѓиевски вели дека МЕМО го развива и системот за Гаранции за потекло на електричната енергија, воспоставен во април 2025 година, со цел следливост и доверба во потеклото на зелената енергија.
„Следна цел е целосно членство во Асоцијацијата на издавачки тела (AIB) со седиште во Брисел и поврзување со европскиот хаб“,
додаде Ѓорѓиевски.
Тој заклучи дека МЕМО останува посветен на изградба на модерен, поврзан и конкурентен пазар кој ќе ја зајакне позицијата на Македонија во европската енергетска слика.
Форумот, организиран од Министерството за енергетика, рударство и минерални суровини, УНДП и регионалните комисии на ОН, собра над 500 учесници од повеќе од 70 земји кои дискутираат за новите насоки на енергетската транзиција.