Официјалните претставници за изборите во Мексико ја одложија прес-конференцијата на која се очекуваше да бидат објавени првичните резултати врз основа на мал процент од пребројаните гласови, пренесува Си-ен-ен
Во Мексико се чекаат резултати од вчерашните претседателски избори, на кои се очекува победник да биде жена.
Двете водечки претседателски кандидатки се жени – Клаудија Шејнбаум од левичарската партија Морена и Ксочитл Галвез, од конзервативната партија ПАН, која ја претставува коалицијата на опозициските партии. Третиот кандидат е Хорхе Алварез Мајнез, кој го претставува централно-левичарското Граѓанско движење.
Официјалните резултати сè уште не се објавени од страна на Националниот изборен институт (ИНЕ).
Официјалните претставници за изборите во Мексико ја одложија прес-конференцијата на која се очекуваше да бидат објавени првичните резултати врз основа на мал процент од пребројаните гласови, пренесува дописникот на Си-ен-ен во Мексико Сити.
Сепак, додава тој, од изборниот штаб на Клаудија Шејнбаум велат дека нејзиниот тим се подготвува за прослава.
Излезните анкети, кои ги пренесуваат странските медиуми, покажуваат дека кандидатката на владејачката партија во Мексико, Клаудија Шејнбаум, најверојатно е победник на вчера одржаните претседателски избори.
Клаудија Шејнбаум, 61-годишната поранешна градоначалничка на Мексико Сити, се предвидува да добие меѓу 55 и 63 отсто од гласовите, пренесува „Гардијан“.
Според истражувањето на Институтот „Енкол“, нејзината противничка Галвез има 29,1 отсто од гласовите. На трето место е Алварез Мајнез со 11,4 отсто од гласовите, покажува истата анкета.
Шефот на владејачката партија Морена, Марио Делгадо, им рече на приврзаниците во Мексико Сити дека Шејнбаум победила со голема разлика. Шејнбаум, која е климатски научник и поранешна градоначалничка на Мексико Сити, е долгогодишен сојузник на актуелниот левичарски популистички претседател Андрес Мануел Лопез Обрадор, кому му беше забрането повторно да се кандидира по шест години на функцијата.
Марио Делгадо ја нарече нејзината очекувана победа „ѕвезден момент во историјата на нашата земја“.
Таа ги отфрли тврдењата на опозицијата дека ќе биде „марионета“ на Лопез Обрадор, иако вети дека ќе продолжи со многу од неговите политики, вклучително и оние кои им помагаат на најсиромашните Мексиканци.