Рускиот напад врз Суми е еден од најсмртоносните оваа година во Украина
Меѓународната заедница денеска го осуди рускиот ракетен напад врз Суми во североисточна Украина, во кој загинаа најмалку 32 лица, јавуваат агенциите.
Според украинските власти, најмалку 32 лица загинаа, а речиси 100 се повредени во руски напад со две балистички ракети врз Суми, меѓу кои и две деца.
Рускиот напад врз Суми е еден од најсмртоносните оваа година во Украина.
„Како поранешен воен службеник, знам што се целни напади и тие се неприфатливи“,
објави американскиот пратеник во Украина, Кит Келог, на социјалната мрежа Икс, пренесе АФП.
Макрон: Русија е единствената што одлучи да ја продолжи војната
Францускиот претседател Емануел Макрон изјави дека Русија ја продолжува војната „без почитување на човечките животи, меѓународното право и дипломатските понуди на претседателот Трамп“.
„Таа војна, сите знаат дека Русија беше единствената што ја сакаше. Денес е јасно дека Русија е единствената што одлучи да ја продолжи. Потребни се силни мерки за воведување прекин на огнот врз Русија. Франција, со своите партнери, работи неуморно на ова“,
порача Макрон во објава на Икс.
Стармер: Брутален потсетник за континуираното крвопролевање
Британскиот премиер Кир Стармер изјави дека е згрозен од нападот врз Суми.
„Згрозен сум од ужасните напади на Русија врз цивилите во Суми и моите мисли се со жртвите и нивните најблиски“,
објави тој на Икс.
Овој последен смртоносен напад е брутален потсетник за континуираното крвопролевање што го спроведува Путин, додаде тој, повторно повикувајќи ја Русија да се согласи на „целосен и моментален“ прекин на огнот.
Полска: Целта на Русија е уништување на украинскиот народ
Полската влада, исто така, го осуди „варварскиот“ руски напад врз Суми.
„Полска го осудува варварското испалување на руски ракети врз Сума“,
објави полското Министерство за надворешни работи на Икс.
Нападот врз цивилите на Цветници покажува дека целта на Русија не е мир, туку уништување на украинскиот народ, додаде министерството, изразувајќи сочувство до семејствата на жртвите.
Мелони и Шолц го осудија „варварскиот напад“
„Ужасниот и кукавички руски напад“ врз Сума го осуди и италијанската премиерка Џорџа Мелони.
Германскиот канцелар Олаф Шолц изјави дека ваквите руски напади покажуваат што значи наводната желба на Русија за мир.
Тој ја повика Русија „конечно да прифати сеопфатен прекин на огнот“.
„Сликите од центарот на градот Суми, каде руски проектили убиваа невини цивили на Цветници се ужасни. Нашите мисли се со семејствата на жртвите и повредените. Оваа војна мора да заврши, а Русија конечно мора да се согласи на сеопфатен прекин на огнот. Ние работиме на таа цел заедно со нашите европски и меѓународни партнери“,
рече Шолц во изјавата на Икс.