Во нон-пејперот што Министерството за надворешни работи на Северна Македонија го испраќа до држави што воведоа политички и економски санкции за Русија, се иницира воспоставување комуникација на различни групи професионалци од Европа и пошироко со нивни колеги во Русија за да се пренесе пораката дека „народот не е виновен за конфликтите предизвикани од нивните ирационални лидери“
Предлагаме општествата во Европа и пошироко да бидат погласни во комуникацијата со своите колеги во Руската Федерација, со цел гласот на разумот да преовлада, пишува во документот во кој имаше увид „360 степени“
Министерството за надворешни работи на Северна Македонија, со нон-пејпер, иницира меѓународна акција за запознавање на руското општество со вистинските случувања во Украина и за пренесување на пораката дека „народот не е виновен за конфликтите предизвикани од нивните ирационални лидери“.
Документот, во кој „360 степени“ имаше увид, се испраќа до земји членки на НАТО, на Европската Унија, но и до други држави кои се придружија или самостојно воведоа политички и економски санкции за Русија. Иницијативата е и во функција на идното претседавање на Северна Македонија со ОБСЕ.
„Одлуката на Кремљ да води војна во Украина е во спротивност со сите основни меѓународни норми, кои го гарантираат суверенитетот, територијалниот интегритет и политичката независност на секоја држава. Народот во Русија треба да биде информиран и свесен за оваа бесмислена и неоправдана агресија, иако пропагандата на нивната влада е во полн замав“,
пишува во документот.
Идејата е, во услови на дезинформациска кампања на која се изложени руските граѓани, да се воспостават канали на комуникација на различни групи професионалци од Европа и пошироко со нивни колеги од Русија.
„Предлагаме општествата во Европа и пошироко да бидат погласни во комуникацијата со своите колеги во Руската Федерација, со цел гласот на разумот да преовлада. Додека се осудуваат постапките на Путин, треба јасно да се каже дека народот не е виновен за конфликтите предизвикани од нивните ирационални лидери. Понатаму, тие треба да се соочат со вистината за нападите врз цивилните објекти – објекти за домување, училишта и болници, како и за цивилните жртви, вклучувајќи жени и деца“,
пишува во нон-пејперот на МНР.
Во документот се оценува дека додека обичните украински граѓани се соочуваат со ужасите на војната, обичните руски граѓани се соочуваат со кампања за дезинформирање и агресивна пропаганда од Кремљ, во обид да се оправда.
Последиците од неиспровоцираната и неоправдана воена интервенција на руската влада во Украина, во поширок контекст, се чувствуваат низ цела Европа и светот. Убеден дека рускиот народ нема да се согласи со оваа агресија и кога ќе се соочи со злото, целиот свет ќе се обедини, се наведува во документот.
„Во оваа насока, ние го поздравуваме гестот на истакнатите руски дејци што го кренаа гласот против војната. На Русија и на целиот свет им требаат уште вакви примери. Целта на овој ангажман е да ги убеди луѓето во Русија дека остатокот од Европа и другите не се нивни непријатели. Треба да ги здружиме нашите напори за да го запреме страдањето. Да го увериме рускиот народ дека сакаме да го вратиме мирот и да ја продолжиме нашата соработка заснована на еднаквост, слобода, правда, почитување на човековите права и пријателски односи меѓу државите“,
се вели во иницијативата на МНР.
Во документот се поздравува и неодамна усвоената Резолуција на Генералното собтрание на ОН за агресијата врз Украина, оценувајќи ја како одличен пример дека Русија е тотално изолирана во нејзиниот наратив.
„На крајот, лидерите ќе си подадат рака, но цената ќе ја плати народот. Тагата на мајката е иста кога се соочува со војна и кога ги губи своите синови. Стариците ќе го чекаат својот маченички син, жената ќе го чека саканиот сопруг, а децата ќе го чекаат својот татко. И сите ќе платат иста цена, без разлика на која страна се од границата“,
се вели во документот.