Претседателот на Советот за безбедност на Русија, Медведев, денеска објави видео на својата Телеграм канал на кое се гледа неговата средба со Си и средбата меѓу кинески и руски претставници
Поранешниот руски претседател Дмитриј Медведев беше во ненадејна посета на Пекинг, каде што разговараше за зајакнување на партнерството со кинескиот претседател Си Ѓинпинг, кој ги повика сите страни да покажат воздржаност во Украина и да го решат конфликтот со политички средства.
Претседателот на Советот за безбедност на Русија, Медведев, денеска објави видео на својата Телеграм канал на кое се гледа неговата средба со Си и средбата меѓу кинески и руски претставници. Кина се надева дека сите страни во украинската криза ќе покажат воздржаност и ќе ги решат безбедносните грижи преку политички средства, му рекол Си на Медведев, јави кинеската државна новинска агенција Синхуа.
Си му изрази надеж на Медведев дека кинеската комунистичка партија и партијата Обединета Русија ќе ја подобрат комуникацијата и мудро ќе ја продлабочат стратегиската соработка меѓу Кина и Русија, додава Синхуа. Медведев рече дека тој и Си разговарале за „безграничното“ стратегиско партнерство на нивните две земји, како и за Украина, без да наведе детали.
„Разговаравме за билатерална соработка во рамките на нашето стратегиско партнерство, вклучително и економијата и индустриското производство. Разговаравме за меѓународни прашања – што секако го вклучува и конфликтот во Украина. Разговорите беа корисни“,
напиша Медведев.
Русија забрзано се свртува кон Кина, со која се обидува да ги зајакне врските, бидејќи е сè поизолирана поради последователните пакети санкции што ѝ ги воведоа Европа и САД поради инвазијата на Украина.
Со посилни економски, политички и безбедносни врски со Кина, Москва се обидува да ја компензира загубата на врските со Западот и го гледа Си како потенцијален сојузник во коалицијата против Западот.