Во својот говор, Меџити потенцираше дека оваа кампања била историска по тоа што јасно се дефинирала разликата меѓу политичките страни
Коалицијата ВЛЕН го заврши изборниот период со голем собир во Тетово. Еден од лидерите на коалицијата, Изет Меџити, упати повик до граѓаните на 19 октомври да гласаат за оние кои нудат конкретни проекти, а не за оние кои се занимаваат со навреди и празни зборови.
Меџити ја истакна поддршката за сегашниот и иден градоначалник на Тетово, Биљал Касами, нагласувајќи дека неговата работа зборува повеќе од зборовите.
Во својот говор, Меџити потенцираше дека оваа кампања била историска по тоа што јасно се дефинирала разликата меѓу политичките страни.
„По прв пат во историјата на нашата демократија имавме кампања каде едната страна зборуваше за проекти реализирани и планирани од локалната власт, и тоа сме ние, а другата страна зборуваше за фолклоризми, но не понуди ниту еден конкретен аргумент“,
рече Меџити.
Тој ја критикуваше другата страна што ја започнала и ја завршила кампањата „со навреди и со користење на имињата на жителите од ‘Фарма на животни’“.
„Затоа, разликата е јасна и сакам вие на 19 октомври да ја направите оваа разлика“,
рече Меџити.
Втората порака на Меџити се однесуваше директно на Тетово. Тој нагласи дека Биљал Касами е првиот човек кој сериозно се зафатил со работите на Тетово во изминатиот четиригодишен период.
„Затоа, тетовчани не само што имаат можност, туку повеќе имаат должност кон себе и кон своите семејства да го поддржат Биљал, затоа што денес повеќе од нашите зборови зборува неговата работа. Јас сум уверен дека и во следните четири години тој ќе биде чуварот и најдобриот градоначалник на најголемиот град на Албанците во нашата земја“,
рече тој.
Меџити упати повик до граѓаните во недела да имаат „празничен ден“ и да излезат да го изразат своето слободно мислење, без каков било притисок и тензија, гласајќи за оние за кои веруваат дека најдобро ќе ги претставуваат.
На крајот, заблагодарувајќи се за достоинствената кампања, Меџити порача дека до 2028 година нема да има повеќе избори, така што „вие ќе имате време да одморите, а ние ќе имаме време да работиме“.