Институциите треба да се остават да дејствуваат насекаде, но не селективно, како што имаше интенција од градоначалничката, вели Меџити
Низ државата се регистрирани повеќе од 200 000 дивоградби и институциите треба да постапуваат неселективно во сите општини, вели вицепремиерот и министер за животна средина Изет Меџити. По информациите за спроведена полициска акција во неколку скопски општини, меѓу кои и Општина Чаир , каде градоначалникот е од коалицијата ВЛЕН, Меџити вели дека борбата со дивоградбите треба да е неселективна, алудирајќи на градоначалничката на Град Скопје, Данела Арсовска.
„Во 80 општини има над 200.000 дивоградби и ако не грешам, во албанските општини предничи Општина Гостивар. Јас ги повикувам институциите да дејствуваат секаде каде што има недозволено и незаконско градење. Институциите треба да се остават да дејствуваат насекаде, но не селективно, како што имаше интенција од градоначалничката“,
рече Меџити.
Претходно, министерот за внатрешни работи Панче Тошковски рече дека полициски службеници од повеќе оддели на МВР влегле во неколку општини во рамки на Градот Скопје, постапувајќи по конкретни наредби дадени од јавен обвинител, а поврзани со бесправна градба.
„Една од општините во кои во текот на вчерашниот ден е влезено од страна на Одделот за организиран криминал е Општина Чаир, како и во Општина Сарај. Полициски службеници вчера влегле и во Општина Аеродром за да обезбедат одредени докази поврзани со бесправна градба. Колку што имам информации, вчера или денеска ќе се влезе и во Општина Кисела Вода“,
рече Тошковски.
Во врска со дивоградбите, Републичкиот јавен обвинител Љупчо Коцевски денеска кажа дека за сите пријави во Општина Чаир како и на територијата на цела држава се поставува во предистраги и истраги, но не посочи конкретни бројки за колку предмети поврзани со дивоградби станува збор.
„Околу дивоградбите имаме неколку предмети. Имаме предмети во истрага, имаме предмети во предистрага. За последните случувања, знаете, вчера судот по жалба на јавното обвинителство определи притвор за потенцијалниот сторител на кривичното дело што значи Јавното обвинителство и понатаму ќе постапува по секоја кривична пријава или евентуално по секој поднесок во врска со дивоградбите“,
вели Коцевски.
Изминатиот период градоначалничка на Скопје, Данела Арсовска, постојано во јавноста презентира случаи со дивоградби во Општина Чаир. На 11 јули Арсовска беше физички нападната на улица „Кумбара“ во скопски Чаир, а случајот беше пријавен во полиција. Според тврдењето на градоначалничката, лицето кое ја нападнало е поврзано со еден од објектите кои се бесправно изградени. Случајот беше пријавен во полиција, а на напаѓачот му е одредена мерка притвор.