Таков е ставот што го добивме од Министерството за животна средина и просторно планирање. На дополнителното прашање, каде се одржувал состанокот, не ни одговорија
Воопшто не добивме одговор од кабинетот на вицепремиерот за добро владеење Арбен Фетаи или, пак, од службата за односи со јавноста на Владата
Вицепремиерот и министер за животна средина Изет Меџети и вицепремиерот за добро владеење Арбен Фетаи биле на состанок во врска со владини политики, кога ги фативме нивните службени возила во 23 часот навечер паркирани на булевар кај ТЦ „Мавровка“. Така барем велат од министерството со кое раководи Изет Меџити.
„Во врска со вашиот објавен текст, Ве информираме дека заменик-претседателите на Владата, во периодот кој Вие го посочувате, учествувале на координативен состанок за владини политики, со посебен фокус на тековните општински проекти…“
Од Министерството уште посочија дека на Меџити и Фетаи, како заменици на премиерот, согласно важечките протоколи и регулативи за заштита на високи државни функционери, им следува 24-часовно обезбедување.
(ФОТО) Ги фативме државните коли на вицепремиерите Меџити и Фетаи пред полноќ близу партиски штаб
Но тоа што возилата беа паркирани на булеварот „Крсте Петков Мисирков“, од Министерството со кое раководи Меџити признаваат дека е прекршок, па велат:
„Во однос на начинот на паркирање на службените возила, преземени се адекватни мерки кон возачите, согласно правилата и применливите дисциплински процедури“.
Овој став го добивме пред неколку дена, во допис кој беше наречен „Реакција“ и покрај тоа што поставивме новинарски прашања пред да ја објавиме вест. Па, откако ја добивме „Реакцијата“, почекавме за објава бидејќи пак поставивме прашање – каде се одржал состанокот за кој од Министерството за животна средина објаснуваат дека имал службен (владин), а не партиски карактер. Не ни кажаа. А, воопшто не не удостоија со одговор и вицепремиерот Арбен Фетаи и од Службата за односи со јавноста на Владата.
Истиот ден кога ни пристигна реакцијата од Министерството за животна средина, на темата се произнесе градоначалникот на Општина Тетово, кој е еден од лидерите на владејачката коалиција ВЛЕН. Билал Касами беше прашан за користењето на службените возила од вицепремиерите.
„Јас не знам за каков состанок се работи, не знам ни дали биле по партиски цели зашто не сум бил јас дел од таков состанок. Бидејќи двајцата се дел од Владата, можеби тука или негде во близина биле на некој состанок во служба на позицијата што ја носат. Со тоа што јас не сум бил дел од таа средба, не верувам дека се состанале за политички работи без да бидам јас присутен“,
рече Касами.
Ноќта на 15 јули во 23 часот забележавме неколку црни „шкоди“ со слични регистрации паркирани крај ТЦ Мавровка, каде што коалицијата ВЛЕН има службени простории. Ги сликавме и следниот ден и прашавме во Службата за општи и заеднички работи од каде што ни потврдија дека едното возило го користи Изет Меџити, а другото вицепремиерот за добро владеење Фетаи. Третото возило не беше во сопственост на СОЗР.
Кога најголемиот коалициски партнер во Владата, ВМРО-ДПМНЕ, беше во опозиција, редовно го осудуваше користењето службени возила за цели што не беа државни од тогашната влада. Во некои случаи бараа и оставки.
Актуелната влада најави решавање на проблемот со можната злоупотреба на службените возила со воведување регистарски таблички во боја за службените возила и воведување механизам преку кој секој граѓанин ќе може да пријави злоупотреба на службено возило, но првичните резултати, според најавите, би требало да бидат видливи во септември годинава.