На прашањето дали чувствува одговорност што дури по полноќ и без присуство на медиуми дошол на местото на настанот и снимил изјава, Меџити одговори дека цело време бил во тек и на линија со министерот за внатрешни работи, иако, рече, МЖСПП не е дел од Управувачкиот комитет за справување со кризи
Повеќе од 15 часа траеше борбата со пожарот во складиштето за рециклирање отпад во Трубарево, тој е локализиран и целосно изгаснат и е спречено негово ширење. Веднаш е ангажирана акредитирана лабораторија за мерење на квалитетот на воздухот и тие ќе продолжат и во наредните денови, изјави денеска на прес-конференција во Владата министерот за животна средина и прв вицепремиер Изет Меџити.
Тој информира дека објектот на компанијата „Групација-Ф“ во Трубарево има важечка дозвола за управување со отпад издадена од Министерството во 2021, која има важност до 2031 година.
„За целосна транспарентност, веднаш ангажиравме акредитирани лаборатории за мерење на квалитетот на воздухот, како од Државниот инспекторат, така и од надворешни специјализирани тела. Веднаш по добивање на информацијата за пожарот, во 13.30 часот, Државниот инспекторат за животна средина се упати на местото на пожарот во објект кој го користи правен субјект ‘Ф Групација’ во Трубарево. Во текот на надзорот беа извршени мерења од акредитирана лабораторија за животна средина ‘Еуромак контрол’ од Скопје и поставен е 24-часовен мерач на квалитетот на амбиентниот воздух. Потоа направени се мерења од лабораторијата за животна средина при МЖСПП. На терен беше и посебна единица на АРМ за радиобилошко и хемиско загадување која исто така направи мерења“,
рече Меџити.
Денеска се очекува да се знае што дишат граѓаните
Министерот соопшти дека денеска „Амбикон“ – акредитираната лабораторија за животна и работна средина од Штипскиот универзитет, ќе изврши дополнителни последователни мерења во наредните пет дена со поставување посебен станичен инструмент.
„Денеска е почнат административен инспекциски надзор кај правниот субјект од кој ќе бидат земени сите потребни документи. По завршување на надзорот, ќе бидат преземени сите мерки – земање мостри од почвата, ќе биде нарачано вештачење за утврдување на точноста во колкава мера било загадувањето врз животната средина. Државните институции понатаму ќе останат на терен и ќе продолжат да работат сè додека не се расветлат сите аспекти на случајот. Ќе бидеме транспарентни до крај, вашата безбедност е наш приоритет“,
рече Меџити.
Тој додаде дека очекува инцидентот да се расветли и причинителот односно причинителите да бидат јавно обзнанени.
На новинарски прашања дали се знае какви материи се шират во воздухот, што дише населението и кога ќе има резултати, одговори дека денеска ќе се знаат и јавноста за сè ќе биде известена детално и транспарентно.
Меџити негираше дека фирмата што го управувала отпадот била сместена во штала и нагласи дека имало хали и имала дозвола за работа до 2031 година.
Меџити не чувствува одговорност
На прашањето дали чувствува одговорност што дури по полноќ и без присуство на медиуми дошол на местото на настанот и снимил изјава, Меџити одговори дека цело време бил во тек и на линија со министерот за внатрешни работи, иако, рече, МЖСПП не е дел од Управувачкиот комитет за справување со кризи.
„Но, тоа не значи дека не сме биле уште од првиот момент. Инспекторатот за животна средина, како што кажав во говорот, веднаш пристапил кон местото и акредитираните лаборатотии во Министерството, како и други акредитирани лаборатории, цело време вршат мерења. Тоа што не бев на прес-конференцијата, не сум бил дел од Комитетот, но постојано сме во тек“,
одговори Меџити.