Во регионот Нижни Новгород, напад со беспилотни летала предизвика пожар во индустриската зона на градот Кстово, каде што се наоѓаат една од најголемите руски рафинерии со годишен капацитет од 17 милиони тони, која е клучен снабдувач за пошироката московска област и петрохемиската фабрика „СИБУР-Кстово“
Украински беспилотни летала синоќа нападнаа голем број индустриски и енергетски објекти на руска територија, предизвикувајќи пожари во рафинерии и петрохемиски фабрики, но и масовни прекини на електричната енергија во неколку региони.
Нападите се случија во близина на украинската граница, а цел се клучни инфраструктурни објекти.
Во регионот Волгоград, пожар избувна во трафостаницата „Фроловскаја“ по напад со беспилотно летало.
Гувернерот Андреј Бочаров потврди дека пожарот е предизвикан од остатоци од соборен дрон. Делови од градот Фролов и соседните области останаа без електрична енергија, а низ целиот регион е прогласена тревога поради опасност од нови напади.
Слично сценарио се случи и во регионот Курск, каде што повеќе од 16 000 потрошувачи во областите Рилски, Глушков и Кореновски останаа без електрична енергија.
Локалниот гувернер Александар Хинштајн го опиша нападот врз трафостаницата како непријателски напад. Пожарот зафати и друга трафостаница во селото Белаја, каде остави седум населби без струја.
Во Башкортостан, два беспилотни летала ја нападнаа петрохемиската фабрика „Стерлитамак“. Гувернерот Радиј Хабиров изјави дека беспилотните летала биле соборени, но нивните остатоци предизвикале штета и делумно уривање на постројката за пречистување на вода. Според достапните информации, немало жртви.
Оваа фабрика, дел од хемискиот холдинг „Росхим“, произведува материјали клучни за нафтената, прехранбената, медицинската и пластичната индустрија.
Во регионот Нижни Новгород, напад со беспилотни летала предизвика пожар во индустриската зона на градот Кстово, каде што се наоѓаат огромната рафинерија „Лукоил-Нижегороднафтооргсинтез“ (НОРСИ) и петрохемиската фабрика „СИБУР-Кстово“. Рафинеријата беше цел на напад на 16 октомври.
Руското Министерство за одбрана објави дека воздушната одбрана пресретнала вкупно 85 дронови во осум региони: Воронеж, Нижни Новгород, Белгород, Курск, Волгоград, Липецк, Башкортостан и Саратов.
Поради нападот, аеродромите во Волгоград, Казан, Нижнекамск, Нижни Новгород, Пенза, Самара, Саратов, Тамбов и Уфа привремено го прекинаа сообраќајот.