Гувернерот на Калифорнија, Гавин Њусом, упати остра критика до администрацијата на Трамп предупредувајќи дека демократијата е „под напад пред нашите очи“
Полицијата на Калифорнија соопшти дека извршила масовни апсења во центарот на Лос Анџелес откако градоначалничката Карен Бас воведе полициски час за центарот на градот по неколкудневните интензивни протести против заострувањето на имиграциските мерки од страна на претседателот Доналд Трамп.
Полицискиот час започна во вторник во 20 часот по локално време и ќе трае до денес до 6 часот наутро по локално време. Полицискиот час се однесува на област во центарот на градот.
„Прогласив полициски час почнувајќи од вечерва во 20 часот за центарот на Лос Анџелес за да ги сопрам лошите актери кои ја искористуваат хаотичната ескалација на претседателот. Ако не живеете или не работите во центарот на Лос Анџелес, избегнувајте ја областа. Полицијата ќе уапси лица кои го прекршуваат полицискиот час, ќе бидете гонети“,
пишува Бас на својот профил на Икс.
I issued a curfew starting tonight at 8pm for Downtown Los Angeles to stop bad actors who are taking advantage of the President's chaotic escalation.
— Mayor Karen Bass (@MayorOfLA) June 11, 2025
If you do not live or work in Downtown L.A., avoid the area.
Law enforcement will arrest individuals who break the curfew, and…
Протестите во Лос Анџелес против имиграциските рации и депортациите на мигранти траат од петокот, а американскиот претседател Доналд Трамп одлучи да одговори на нив со распоредување на 4 000 припадници на Националната гарда и 700 маринци, спротивно на препораките на калифорниските власти.
Гувернерот на Калифорнија, Гавин Њусом, упати остра критика до администрацијата на Трамп предупредувајќи дека демократијата е „под напад пред нашите очи“.
„Авторитарните режими почнуваат со таргетирање луѓе кои се најмалку способни да се одбранат. Но, тие не запираат тука. Трамп и неговите лојалисти напредуваат од поделбите затоа што им овозможува да преземат поголема моќ и да вршат уште поголема контрола“,
вели Њусом.
Тој предупреди дека ситуацијата што се одвива во Калифорнија е само почеток.
„Ова е за сите нас. Ова е за вас. Калифорнија можеби е прва, но очигледно нема да заврши тука. Следни се другите држави. Следна е демократијата. Демократијата е нападната пред нашите очи, овој момент од кој се плашевме дојде“,
додаде тој.