„Украинските хакери му го ‘честитаа’ роденденот на Путин со тоа што извршија голем напад врз серуската државна телевизија и радиодифузна компанија“, изјавил изворот за Ројтерс кој побарал да остане анонимен
Украинските хакери се одговорни за големиот сајбер-напад врз руската државна медиумска компанија ВГТРК што се случи денеска, а кој се совпадна со 72. роденден на рускиот претседател Владимир Путин, соопштил украински владин извор, пренесе Ројтерс.
„Украинските хакери му го ‘честитаа’ роденденот на Путин со тоа што извршија голем напад врз серуската државна телевизија и радиодифузна компанија“,
изјавил изворот за Ројтерс кој побарал да остане анонимен.
Ројтерс не можел независно да го потврди тоа тврдење.
Портпаролот на Кремљ, Дмитриј Песков, претходно потврди дека ВГТРК била цел на сајбер-напад без преседан, додавајќи дека експертите работат напорно за да откријат кој е одговорен и дека ВГТРК работи на надминување на последиците од нападот.
ВГТРК, која ги поседува и управува главните национални ТВ-канали и голем број регионални канали и радиостаници, претходно во понеделникот објави дека нејзините интернет-услуги станале цел на сајбер-напад во текот на ноќта, но дека и покрај тоа, радиото и ТВ-емитувањето сѐ уште функционирале.
„Нашиот државен медиумски холдинг, еден од најголемите, се соочи со невиден хакерски напад врз неговата дигитална инфраструктура. Експертите се обидуваат да ги утврдат сите околности со цел да разберат каде водат трагите што ги оставиле сторителите на овој хакерски напад“,
рече Песков.
Говорејќи во Москва, Марија Захарова, портпаролка на руското Министерство за надворешни работи, не кажа кој стои зад нападот, но им рече на новинарите дека руските медиуми одамна станале мета на, како што таа го нарече, „колективниот Запад“ и рече дека тоа што се случило е дел од „хибридна војна“.