Од МВР информираат дека по целосно документирање на случајот против 44-годишниот Ф.А. од крушевското село Јакреново, во чиј дом се случил настанот, ќе биде поднесена соодветна пријава
Откако на социјалните мрежи се појави вознемирувачка видео-снимка, на која се гледа како малолетничка вперува пушка во главата на друго дете, од Министерството за внатрешни работи (МВР) денеска соопштија дека го расветлиле случајот и дека нивни службеници го одзеле оружјето и дозволата за негово поседување.
Како што соопштија од МВР, настанот се случил во домот на 44-годишниот Ф.А. од крушевското село Јакреново.
Оттаму велат, дека откако било пријавено дека на социјална мрежа е објавено видое на кое се гледа како 15-годишно девојче вперува огнено оружје кон главата на својот 11-годишен брат, вчера во 13 часот полициски службеници од Одделението за внатрешни работи (ОВР) Крушево отишле во домот на Ф.А.(44) во Јакреново и одзеле ловечка пушка, ременик и дозвола за поседување оружје.
„По преземени мерки беше утврдено дека настанот се случил во неговиот дом и беа направени консултации со јавен обвинител, оружјето е одземено и по целосно документирање на случајот против Ф.А. ќе биде поднесена соодветна пријава“,
се вели во соопштението од МВР.