Осврнувајќи се на најновата извршна наредба на Трамп за воведување нови глобални царини од 10 отсто, Макрон најави дека Париз детално ќе ги разгледа последиците и соодветно ќе се приспособи
Францускиот претседател Емануел Макрон денеска оцени дека одлуката на американскиот Врховен суд да ги укине царините на Доналд Трамп е доказ за важноста на владеењето на правото и постоењето контролни механизми во демократските општества.
Коментирајќи ја судската одлука со која претходните тарифи на американскиот претседател беа прогласени за незаконски, Макрон од годишниот земјоделски саем во Париз порача дека е добро да се има противтежа на извршната власт.
„Не е лошо да се има Врховен суд и, следствено, владеење на правото. Добро е да се има моќ и противтежа на моќта во демократиите“,
рече Макрон.
Осврнувајќи се на најновата извршна наредба на Трамп за воведување нови глобални царини од 10 отсто, Макрон најави дека Париз детално ќе ги разгледа последиците и соодветно ќе се приспособи, воедно нагласувајќи дека Франција има намера да продолжи со извозот на своите производи на американскиот пазар, потенцирајќи ги земјоделските стоки, луксузните и модните брендови, како и деловите за воздухопловната индустрија.
Според Макрон, во вакви ситуации е неопходно да се реагира смирено, испраќајќи јасна порака до Вашингтон за идните трговски односи.
„Најфер правило е реципроцитет, а не потчинување на еднострани одлуки“,
изјави тој.
Откако американскиот Врховен суд ги укина сеопфатните царини кон десетици земји, американскиот претседател Доналд Трамп потпиша извршна наредба со која се воведуваат нови глобални царини од 10 отсто за сите земји. Претходно, најавувајќи ја мерката, тој појасни дека новите 10 отсто ќе бидат „дополнителни на нормалните тарифи што САД веќе ги наплаќаат“.