Овие посети доаѓаат откако лидерите ширум Европа изразија загриженост дека САД ги заобиколуваат во обидите да преговараат за мир со Русија во Украина
Францускиот претседател Емануел Макрон ќе го посети Вашингтон следната недела, соопшти советникот за национална безбедност на Доналд Трамп, Мајк Волц.
Американскиот претседател Доналд Трамп синоќа потврди дека неговиот француски колега Емануел Макрон ќе пристигне во Вашингтон, „можеби во понеделник“, поради несогласувањата околу решавањето на конфликтот во Украина.
Запрашан во претседателскиот авион за датумот на неговата средба со Макрон, Доналд Трамп одговори:
„Многу наскоро, можеби во понеделник“.
Британскиот премиер Кир Стармер исто така ќе оди во Америка истата недела, изјави Волц за Фокс њуз.
Овие посети доаѓаат откако лидерите ширум Европа изразија загриженост дека САД ги заобиколуваат во обидите да преговараат за мир со Русија во Украина.
Коментирајќи ги изгледите за постигнување мировен договор, Волц рече:
„Ние се ангажираме од сите страни, а следниот чекор е дека ќе испратиме технички тимови за да почнеме да разговараме за повеќе детали“.
Во вторникот рускиот министер за надворешни работи Сергеј Лавров и американскиот државен секретар Марко Рубио одржаа билатерални разговори во Саудиска Арабија и се договорија да преговараат за Украина, без да го поканат Киев или Европејците, кои стравуваат дека договорот може да биде постигнат зад нивниот грб и против нивните интереси.
Претседателот Макрон во средата рече дека позицијата на Франција и нејзините партнери за Украина и европската безбедност е „јасна и обединета“, по консултациите со европските и неевропските земји.
Макрон во понеделникот го одржа првиот итен состанок со европските партнери, а вториот во средата. Тема на разговорите беа Украина и европската безбедност.