Според информацијата на македонската амбасада во ОАЕ, в среда во шест часот наутро автобус од Манама, Бахреин, ќе појде кон Ријад, Саудиска Арабија, од каде што потоа со специјален лет македонските државјани ќе бидат вратени во Македонија
Македонската амбасада во Обединетите Арапски Емирати (ОАЕ) вечерва преку Фејсбук информира дека в среда ќе се реализира транспорт за македонските државјани кои во моментов се наоѓаат во Бахреин.
Според информацијата, в среда во шест часот наутро автобус од Манама, Бахреин, ќе појде кон Ријад, Саудиска Арабија, од каде што потоа со специјален лет македонските државјани ќе бидат вратени во Македонија.
„Македонските граѓани во Бахреин ги информираме дека в среда, на 11 март во 06.00 часот наутро, ќе поаѓа автобус на Flynas од Бахреин, Манама, за Ријад – King Khaled International Airport од каде што со специјален лет организиран од владата на Македонија ќе се вратите во нашата земја“,
соопшти македонската амбасада во ОАЕ.
Шефот на македонската дипломатија Тимчо Муцунски денеска изјави дека сите македонски државјани од Блискиот Исток кои побарале помош ќе бидат евакуирани во земјава до средината на неделава.