Сепак, доколку сакаме до 2030 година да бидеме уште повисоко на европската економска скала, посочи дека треба да го одржуваме просекот што ќе биде поголем од 4 отсто. Тоа, додаде, не зависи само од нашите внатрешни параметри, тоа многу зависи и од екстерните фактори
Македонската економија е рангирана на четврто место според растот на БДП во првиот квартал и се наоѓа веднаш зад Ирска, Данска и Полска. Ова денеска го изјави премиерот Христијан Мицкоски на прес-конференција во Владата, на која информира дека, според прелиминарните податоци на Државниот завод за статистика (ДЗС), во првиот квартал на 2025 година, реалниот раст на бруто-домашниот производ, откако е избрана оваа влада, трет квартал по ред е 3 или повеќе отсто, а приспособениот согласно сезонските и календарските податоци е 3,2 проценти, според бројката којашто ја објавува Евростат.
„Со тоа, практично, на досега објавените параметри коишто ги објавил Евростат, македонската економија е рангирана на четврто место, веднаш зад Ирска, Данска и Полска. Тоа е многу значајно и ова не е случајност“,
рече премиерот.
Според него, ова е доказ дека кога државата се води на исправен начин, но и со знаење, со план и со трпение, резултатите мора да дојдат.
„Овој раст е многу сериозен сигнал дека реформите даваат резултати, имајќи предвид дека станува збор за првиот квартал од годината што секогаш е најслаб и би рекол и најпредизвикувачки“,
кажа тој.
Сепак, доколку сакаме до 2030 година да бидеме уште повисоко на европската економска скала, посочи дека треба да го одржуваме просекот што ќе биде поголем од 4 отсто. Тоа, додаде, не зависи само од нашите внатрешни параметри, тоа многу зависи и од екстерните фактори.
„Имајќи предвид дека просекот во рамките на ЕУ е 1,4 отсто, тогаш можеме да кажеме дека ние сме 2 и пол пати над тој просек, а во еврозоната е 1,2 отсто. Белгија е 1,1 отсто, Германија е 0 отсто, Естонија е 0,1 отсто, Франција 0,6 отсто, Италија е 0,7 отсто, Латвија е -0,3 отсто, Унгарија е -0,4 отсто, Австрија е -0,7 отсто, Романија е 0,5 отсто, Словенија е -0,8 отсто, Словачка е 1 отсто, Финска е 0,8 отсто, соседна Србија во првиот квартал е 2 отсто“,
вели Мицкоски.
Како што посочи, целта на оваа влада била да се решат дупките во продуктивност и вработувањето.
„Важно е што покажавме дека државата конечно функционира. Тоа го гледаме во странските инвестиции што растат, во индустриското производство што се стабилизира и веќе втор квартал по ред е позитивно, во новите инвестиции што се реализираат од Гевгелија до Куманово, од Кичево до Штип, од Делчево до Дебар. Овој раст не е само бројка, тоа се нови фабрики, нови машини, нови договори, нови плати, нова надеж. Тоа се семејства што ќе имаат повеќе сигурност, тоа се млади луѓе што гледаат причина да останат и да се борат тука во својата земја. Знаеме дека економијата не е ништо без луѓето, затоа ја градиме економијата со луѓето, со трудољубиви работници, со креативни млади, со стручни инженери“,
рече тој.