Оттаму упатија апел до сите синдикални организации да се вклучат во решавање на сите предизвици со кои се соочува претпријатието, без да бидат манипулирани или провоцирани
Политички мотивирано и тенденциозно е организирањето штрајк во услови кога за сите вработени е обезбедена плата, соопштија од државната компанија „Македонска пошта“ откако денеска нејзини вработени излегоа на протест на кој го искажаа својот револт поради доцнењето на декемвриската плата.
„Крајно тенденциозно е организирање штрајк од страна на еден од Синдикатите на вработените во ‘Македонска пошта‘, во услови кога за сите вработени е обезбедена платата. Од тие причини веруваме дека тој е политички мотивиран, а вработените се изманипулирани од одредени политички структури со што се нарушува нормалното функционирање на претпријатието“,
велат од компанијата.
Оттаму велат дека Синдикатот е навремено информиран дека за сите вработени има обезбедено плата.
Од раководството на компанијата посочија и дека се во постојана комуникација и координација со Владата, како и дека со заедничка соработка ги надминуваат проблемите што настануваат во тековното работење.
Упатија апел до сите синдикални организации да се вклучат во решавање на сите предизвици со кои се соочува претпријатието, без да бидат манипулирани или провоцирани.
„‘Македонска пошта‘ работи со полн капацитет, а во наредниот период ќе ја подигнеме ефикасноста и услугите кон сите коминтенти“,
пишува во соопштението од компанијата.
Вработени во државната компанија „Македонски пошти“ денеска излегоа на протест на кој го искажаа својот револт поради доцнењето на декемвриската плата.
Тие велат дека работат за минимална плата, но и таа не можат да ја добијат навреме, поради што најавуваат дека доколку и наредниот месец се повтори идентична ситуација ќе донесат одлука за следните чекори, а не ја исклучуваат и можноста од штрајк.
Според тврдењата на синдикалните организации, освен вработени во скопските филијали на „Македонски пошти“, протестираат и нивните колеги во градовите од внатрешноста на државата.