Во потрагата биле вклучени патролен брод на крајбрежната служба, три приватни чамци, како и две патролни возила кои пребарувале на копно
Грчката крајбрежна служба успешно ја пронашла 63-годишна македонска државјанка, која била пријавена за исчезната додека пливала во морскиот дел кај Неа Каликратија на Халкидики. Жената е пронајдена на копно во добра здравствена состојба и не побарала медицинска помош, пишува дописничката на МИА од Атина.
Акцијата за пребарување почнала откако вчера попладне Единствениот центар за координација на истрага и спасување добил пријава за исчезнатата капачка.
Во потрагата биле вклучени патролен брод на крајбрежната служба, три приватни чамци, како и две патролни возила кои пребарувале на копно. Благодарение на координираната акција, жената е пронајдена на копно во истата област.
Според информациите од грчката крајбрежна служба, жената, чиј идентитет не е откриен, се чувствува добро и не сакала никаква медицинска интервенција.